Bayern-in Kompany an ‘risk’ dawn!

Football khelh a bansan hnua team tenau pahnih Anderlecht leh Burnley tihte bak head coach ni chunga la enkawl lo Vincent Kompany chu Bayern Munich-in Thomas Tuchel thlaktu atan kum thum daih contract an ziahpui a, club liana a dinhmun tur hi sawilawk thiam a harsa a, Bundesliga giants tan ‘risk’ sang tak ni tura ngaih a ni!
Kum 38 mi Kompany hian 2022-23 season khan Burnley chu Premier League hnuai chiah Championship title lakpui bawk mah se Belgian coach hoa English top flight-a an season khatnah Clarets chu inhamtang zo loin table-a 19-na luah chungin Championship lamah bawk an tla zui leh!
Premier League lamah pawh manager ni chunga hnuhma tha la nei pha lo rawih ngawt mai chu Bayern tan chona lian tak a ni ngei dawn a; chumi piahlamah Bundesliga club hian English team coach chhawr lai an chhuhsak manah Burnley hi compensation fee pound maktaduai 10.2 an pek a la ngai cheu dawn!
Kum 2020-a inkhelh bansan Kompany hian kum 2022 khan an ram club Anderlecht atangin Burnley a zawm a, English club-ah hian nikum mai khan kum nga dang atan a contract neih lai a pawtsei a, mahse, club lian zawk an lo lan tak avangin Germany lamah a insawn ta a ni.
Manchester City defender hlui chuan Bayern-a a thawk thei tur chu chawimawina ropui tak a nih thu sawi chungin FC Bayern chu international football huap pawha inzirna lian a nih thu a sawi.