Europa Conference League champion Olympiacos

May 30, Nilai zan khan Europa Conference League final khelh a ni a. Inkhel hmuhnawm takah Olympiacos chuan extratime-a Ayoub El Kaabi goal thun hmangin Fiorentina an hneh a, an champion. Olympiacos hi Greek club zingah European competition a champion hmasa ber an ni.
OPAP Arena, Athens a inkhel hmuhnawm takah Greek club lian Olympiacos leh Italian club Fiorentina ten inkhel hmuhnawm an lantir a, an inhnehtawk hle. An rama inkhel an ni bawk a Olympiacos in ngam takin an khingpuite an nawr a, goal thun theihna hun tha an nei hmasa. Wolves atanga an hawh mek midfielder Daniel Podence pet hlauhawm tak chu Fiorentina goalkeeper Pietro Terracciano chuan tha zetin a lo dang a, an team a chhanhim. Goal thun tumin hlauhawm siam ve ve mah se hun pangngai tawp thlengin goal thun thei an awm lo.
Minute 60 chhunga goal thun thei an awm loh hnuin extratime minute 30 dang khelh belh a ni a, Olympiacos in goal an thun ta nge nge. Semi-final-ah 6-2 ngawta Aston Villa an sawp tuma goal thun thei tak Ayoub El Kaabi chuan minute 116-naah goal pawimawh tak a thun a, hmahruaina goal a thun. El-Kaabi-a’n Europa conference league a goal 11 a thun tlina hmangin Olympiacos hian hnehna pawimawh tak an chang a, Greek club zingah European competition a champion hmasa ber an ni ta a ni.
Europa conference league-ah a vawi khat nan Olympiacos an champion laiin Fiorentina erawh final-ah an vanduai zawn thung. Season liam ta final-ah West Ham an hneh lo tawh a, Olympiacos lakah an vanduai leh ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More