Bayern in Nagelsmann an ban, Tuchel la lut

Bayern in Nagelsmann an ban, Tuchel la lut
German champion Bayern Munich chuan an manager rawih mek Julian Nagelsmann an ban a. An manager thar atan Chelsea manager hlui Thomas Tuchel an dawr fel nghal niin media hrang hrang ten an tarlang.
German champion Bayern Munich hian season kal mekah beisei an phak lo va, Bundesliga-ah pahnihna an ni mek. Bayern hian khelh 25 atanga point 52 an hmu mek a, an chunga awm Borussia Dortmund chu point khatin an phak lo mek. Champions League-ah quater-final lut tawh bawk mah se kum 35 mi Nagelsmann lakah rinna an nghat ngam tawh lova, international break laia inban felin an manager thar tur Thomas Tuchel hian thawhtanni khian Bayern Munich a zawm dawn niin an tarlang.
Manager naupang, ropui taka RB Leipzig lo kaihruai tawhtu Nagelsmann hian kum 2021 khan Bayern Munich hi a enkawl tan a. Bundesliga-ah champion pui nghal mah se Champions League quarter-final-ah Villarreal an hneh lo ringawt thung. Champions League season kal mekah Bayern hi an chetha viau thung a, quarter-final an luh thlengin an la chak fai vek a. An khingpuite lakah goal 21 zet an thun laiin goal hnih chauh an chhuah thung. UCL-ah chetha viau mahse Bundesliga lamah erawh beisei an phak lo thung a. An trophy kawl mek humhim turin manager thar atan Thomas Tuchel lak luh an thlang.
Bayern Munich manager thar ni tura tarlan Thomas Tuchel hian Bayern Munich chunga awm mek Borussia Dortmund a lo enkawl tawh a. EPL club lian Chelsea bakah PSG a lo enkawl tawh bawk. Bayern Munich manager thar a nih hnua inkhel a hmachhawn hmasak berah a club hlui Dortmund hmachhawn in, fiahna hautak a hmachhawn nghal a ngai dawn.
Manager Nagelmann ban leh manager thar Thomas Tuchel lak luh chungchangah Bayern Munich chuan he thu buatsaih lai thleng hian thuchhuah an la siam lova, media rintlak tak takte chuan an tarlan nasa viau tawh thung.