Bayern Munich chak nuamsa

Bayern Munich chak nuamsa
Thawhlehni zan German Cup first round match-ah he tournament-a tum 20 tehreng champion tling tawh Bayern Munich chuan sili faiin mualneitu third-tier club SC Preussen Munster an sawp a; khelmual chhungah an team-in hnehna chang chiang hle mah se Bayern supporter-te hian lungawilohna lantirin khelmual chhungah tennis ball an vawmlut chiam.
Division hniam team luhkhung an ni bawk a, Bayern boss Thomas Tuchel chuan an player tha engngemawzat chawlhhahdamtirn, chu’ng zingah chuan an club record signing Harry Kane pawh a tel a, chuti chungin hnehna an chang zui leh ta tho a ni.
He match hi kumin August thlaa khelh tura ruahman daih tawh kha niin, a hun an sawn a, chu chu duh loin Thawh-lehni zan khan Bayern fans lamin ‘protest’ an lantir a, tennis ball vawm-luh a nih avangin a chharkhawm hun chhung inkhel kal lai rei vak lo tihtawp a nih phah nghe nghe.
Kane awm lo mah se goal-ah Bayern-in harsatna an tawk lo a, rawlthar kum 18 mi Mathys Tel chuan goal khat thunin assist vawikhat a nei bawk.
Goal hmahruai hi minute kuana leka French forward Eric Maxim Choupo-Moting thun niin, chawlhlawk hma minute nga la awmah Konrad Laimer chuan sihnih faia mikhual team hmahruaina goal a tauhlut ve leh.
First half hun pekbelh minute ngana a liam hma chiahin kum 20 mi Frans Kraetzig chuan Bayern tan khungbelh ve lehin, half-time a nih chuan sithum faiin Tuchel-a team hian hma an hruai hman.
Tarlan tak angin, Munich goal lina hi minute 86-a France youth international Tel thun niin, kum 2020 hnu lama he trophy la chawi leh ngai ta lo Bayern Munich chuan nuamsain German Cup second round an lut phawt.
Substitute bench lama thu tluan ta Kane khan karliamta Inrinnia 7-0 tehrenga VfL Bochum an sawp tum khan ‘hat-trick’ a siam a, Cup lamah an hahdamtir a ni.
Kha match behchhana Bayern tana hlimawm loh awmchhun chu first eleven-a tel Serge Gnabry inhliam kha niin, a hnua endikna result an tarlanah club thuchhuah chuan an player ban veilam ruh chu a auh tih an nemnghet a, manager Tuchel chuan Germany forward hliam chu Nilainia zai a nih tur thu leh hun engngemawchen a chawlh tur thu a sawi.