Bayern record dinglai tluktu Leverkusen
Pathianni Bundesliga inkhel pakhatah Bayer 04 Leverkusen chuan sili faia an mikhual 1. FC Union Berlin sawp chungin table-ah a sangber an luah chho leh ta a; kha result avang khan Xabi Alonso team hian season kal lai an khelh tawh china point hmuh theih 33 awm atangin point 31 ngawt an hmu tling a, league khelh 11 thlenga point rut hnember nihna kum 2015-16 daih tawha lo chang tawh Pep Guardiola enkawl Bayern Munich record an nihrualpui thei ta a ni.
Pathianni zan inkhela Bayer Lever-kusen goal li lut hi mi hrang hrang pali thun niin, goal hmahruai hi minute 23-a Alex Grimaldo thawh a ni a, first half-a goal lut awmchhun a ni nghal.
Second half-ah Odilon Kossounou, Jonathan Tah leh Nathan Tella-te’n mualnei-tu team tan goal khat diat diat thawhkhawm ve lehin, an kawtkaia an point thum hlawh-chhuah hmang hian Leverkusen rchuan Bayern pawtthlain a ler an luahkir leh.
Hnehna an chan zawhah Spain leh Liverpool midfielder hlui Alonso chuan rilru nuam taka an awm thu sawi chungin a naute game-a an insawrbing tlat thu a sawi a, tunah hmahruaitu ni leh mah se match tam tak khelh tur a la awm thu leh football-ah chuan thleng thei-a-pui a tam thu sawi chungin thawklehkhatah an beiseinate chu chhembo ang maia bo duak thei a nih thuin a naute a fuih.
Leverkusen hian season kal lai inelna hrang hranga match 17 an khelh tawhah tum 17 hnehna changin, chu’ng zinga a hnuhnung 12-ah an chakzawn nghe nghe.
Nikum October thla mai khan league khelh riata table mawngphah an luah laiin Leverkusen-in head coach atan Alonso an senglut a, parukna ni chunga season kharin Europa League semi-final a thlenpui bawk.
Germany a pan hmaa Alonso manager hna chelh tawh chu kum thum chhung Real Sociedad B team a enkawl kha niin, ku 2017-a inkhelh a bansan hnu khan coaching lam a hawi zui ta a ni.
Inrinni khan 4-2-a Heidenheim hneh chungin champion lai Bayern chuan table-ah a ler an luah chho a, Pathiannia Leverkusen an chak leh tak avangin an record malkhalh chuhpuitute lakah an hmahruaina an hum zo lo.
A zawna vawikaw tlawm tling ta Union Berlin chuan point ruk ve bawk humtu Koln laka goal difference-a an hniam zawk avangin table mawngphah an luah thla ve ta nge nge bawk.