Bazar building sak duhdah dem A viltu tur sawrkar pawh dem

Aizawl New Market building tur sak mek duhdah taka sak a ni chu an dem a, hnathawh viltu tur sawrkar pawh an dem a, enfiaha hma la turin an beisei tih Mizoram First chuan an sawi.
Tunhnaia ram hmasawnna tura pawl din thar Mizoram First thuchhuak chuan, Aizawl New Market sakthata building pakhat sak lai plinth/foundation buaipui mek chu Mizoram First team-in July 8 (Inrinni) khan an tlawh a, an tlawh lai tak hian a foundation plinth-beam an lo chhung a. An chhun lai chu tui tam tawkin a chim a, chuti chung chuan thawktuten cement chawh sa chu tui tlingah hian an chhung mawlh mawlh a; video-a an record chu social media-ah pawh a lang nual tawh tih a sawi.
‘He video darh vang nge, beam chhun hi vuak chhiat leh a ni tih thawm a rawn awm leh a. Mahse Mizoram First team, a hmuna entute chuan a chunglam leh engemaw chin chauh vuakchhiat a ni tih an hmu a ni,’ a ti.
Beam chhunna atana an cement hman hi a char hma chi (quick setting) a nih bawk si loh avangin, building foundation atana hetianga chhun a nih chuan building a tiderthawng dawn a ni tih chu thil chiangsa a nih thu sawiin, hetiang hian mualpho lo ta se tun ang hian an kalpui zel dawn tihna a ni em, tih an zawt a. Helai an khawih hmaa an lo zawh tawhte pawh a ngaihthat thlak ta lo hle tih a sawi.
‘New Market building hi khawpui hmun laili taka awm, mipui tam tak chet tlatna tur a nih avang leh lirnghinna ram (seismic zone 5) a awm kan nih bawk avangin he hnathawh duhdah taka kalpui hi mipui himna ngaihpawihmawh lohnaah kan ngai a. A thawktute kan dem rualin, sawrkar pawhin enfiaha hma la turin kan beisei a ni,’ Mizoram First chuan a ti.
October 2019 atanga sak tan tawh he building hi October 2021-a zawh tura ruahman leh agreement siam a ni chungin, tun thlenga hna zawh a la ni lo leh, tuna an thawh dan ang chuan hun rei tak la ngai tur anga lang chu, hmanrua a tlemin hnathawktute an beitham hle nia a lan thu a sawi a. Keimahni leh kan thlahte tan a ni tih hria a, ro tling leh belhchian dawla hna thawk turin a satu Lushai Engineers a ngen tih a sawi a. Sawrkar pawhin mipui tuarna tinep thei tur ber leh ram rotling atan hma la turin a ngen tih a sawi bawk.