Bazarah Arsenal an tal na

Nipui bazar inhawng mekah London club lian Arsenal an talna rih viau a, tunkar chhungin player pali hrawl lak luh hman an tum. Gunners hian lak an tum ber Declan Rice an dawr fel hnuin Emeric Laporte leh Real Madrid star Aurelien Tchouameni lak tumin an hel leh mek.
Champions League leh Premier League-ah tha zawka inlan tum Arsenal hian an player ni tura an awh em em Declan Rice chu West Ham atangin an la thei ngei dawn niin a lang a. Rice hi mimal inremna an neihpui tawh bakah Hammers nen hian man leh mualah inremna an nei thei tawh bawk. Rice hian Arsenal-ah medical test hmachhawn turin a chawlh a pawt tawi a, London lamah a kir leh tawh. Dubai-ah chawlh hmanga zinchhuak Rice hi London-ah thlawk haw chuk chukin medical test a hmachhawn zui ang a, Arsenal a zawm thu hi puanchhuah thuai a ni a beiseiawm. Rice hian Arsenal a zawm fel a nih chuan Brtish player manto ber record thar a siam ang.
Rice an dawr fel bakah Gunners hian Ajax leh Netherlands defender Jurrien Timber an hnaih viau tawh bawk. Timber pawh hi tunkar chhung hian dawr fel hman an tum. Rice leh Timber an dawr fel hma hian Chelsea leh Germany forward Kai Havertz chu £65m in an lei fel tawh. Germany forward Havertz hi Arsenal player hlawh hnem ber a ni nghal dawn niin tarlan a ni. Havertz, Rice leh Timber bakah hian Southampton midfielder Romeo Lavia an hnaih viau tawh niin tarlan a ni a. Lavia hi Liverpool in lak tumin hma an la thar ve leh thung.
EPL a tawnhriat nghah pahnih Rice leh Havertz leh Netherlands tana khel tha thei tak Rice ta an la lut ngei dawna a lan hnuin Arsenal hian duhtawk an la ngah mai lova, player dang lak tur an melh zui leh nghal zat. Gunners hi lak tuma an hel thar lehte hi Manchester City defender Emric Laporte leh Real Madrid leh France midfielder Aurelien Tchouameni te an ni.
EPL champion Manchester City chuan RB Leipzig leh Croatia defender Josko Gvardiol an la lut ngei dawn niin a lang a, German club nen man leh mualah inremna an nei tawh. World Cup 2022 a hming chher tak Gvardiol hi City in an la lut a nih chuan Spain defender Laporte hma lam hun tur a chiang lo nghal. Laporte hi a hian Etihad Stadium a chhuahsan lo a nih pawhin kum dang angin khelhna hmun a chang tam thei tawh lo tura ngaih a ni. Heti a nih vang hian khelh tam theihna tur club pana chhuah a duh rin a ni. Hma lam hun chiang lo thar Laporte hi Arsenal hian lak tumin an ngaihven nghal var a. Italian Serie A club lian Juventus in lak tumin an ngaihven bawk. Laporte an la thei a nih chuan Arsenal hian champions league leh EPL-ah champion an tum ngam ngei ang.
Gunners hian Romeo Lavia lak tum laiin Real Madrid leh France midfielder Aurelien Tchouameni an ngaihven thar leh bawk. Arsenal in an ngaihven Tchouameni hi chuan Real Madrid-ah cham chhunzawm a duh thung a. Lak tuma hel mektu Arsenal hian an hmin thei ang em tih a la chiang lo. Season liam taah uiawm taka an champion zo ta lo kha Arsenal hian hreawm an la ti em em a. Khatiang kha thlen nawn tir an tum tawh lo viau a, trophy lak ngei tumin an squad thuam chak hna an thawk mek a. An squad thuam chak turin sum sen pawh an hreh lo ta viau bawk.