BBMA-a perform tur puan hmasak ber SEVENTEEN leh Teddy Swims

BBMA-a perform tur puan hmasak ber SEVENTEEN leh Teddy Swims
K-pop group SEVENTEEN leh Teddy Swims te chu 2024 Billboard Music Awards semnaah perform tur puan hmasak berah an tang. BBMA hi actress leh comedian Michelle Buteau-i’n a host dawn a, December ni 12-a sem tur a ni.
SEVENTEEN leh Teddy Swims te hi kumin Billboard chart-ah an mikhual lo hle a, Swmis hla hit ‘Lose Control’ chu March thla khan Billboard Hot 100 (singles) chart-ah No.1 kaiin, a hla dang ‘The Door’ pawh October thla khan No.24 a kai a, a debut album ‘I’ve Tried Everything But Therapy (Part 1)’ pawh Billboard 200 (albums) chart-ah No.17 a kai thei bawk. SEVENTEEN pawhin 2022 hnu lamah Billboard 200 chart-a top 10 kai thei album paruk an nei tawh bawk.
SEVENTEEN leh Teddy Swims te hi kumin BBMA finalist (BBMA-ah hian nomination an ti ve lo a, finalist an ti thung) an ni ve ve a, SEVENTEEN hi K-pop touring artist-ah finalist niin, Swims hi category pariat-ah finalist niin, top new artist, top song sales artist, top Hot 100 song, top streaming song, top radio song, top selling song, top Billboard Global 200 song, top Billboard Global (excl. U.S.) song-ah te a lang.
Kumin BBMA-ah hian Zach Bryan, Taylor Swift, Morgan Wallen leh Sabrina Carpenter te chu finalist nihna ngah zual an ni a, kumin hian award semna show hi FOX-in an tichhuak dawn a, anni hian BBMA an sem tan kum 1990 atanga 2006 thleng he award semna show hi an tichhuak thin a, kuminah an chang leh dawn ta a ni, hei bakah hian Paramount+ lamah on-demand stream a ni dawn bawk.