BCM-in MPF-a tel a la rel thlu thei lo

Baptist Church of Mizoram chuan Mizoram People Forum-a tel a rel a, tel a la rel thlu thei lo.
BCM Assembly vawi 128-na neih meka rorel ni hnihna Zirtawpnia neih hi president Rev F Ramdinmawia’n a kaihruai a, Administrative Committee leh Assembly Executive atanga thu lut bakah Area Baptist Council atanga thu lut engemawzat ngaihtuah a ni.
Thurelah hian Mizoram People Forum (MPF) atanga thawk ho tura sawmna lut chungchang ngaihtuah a ni a, rei tak sawiho niin, Assembly palaiten MPF-a tel ve tha an tih hle rualin, uluk leh ngun zawka ngaihtuah that leh nise, tiin an dah.
Thurel dang zingah, Christian Hospital Serkawna hman tur CT Scan lei nan special appeal siam, 2025- 2026 atanga AICS a MTh (Old Testament) hawn, Higher & Technical Institute Mizoram (HATIM) New Education Policy mila kalpui, tih te a tel a. Kohhran hnuaia thawktu hrang hrang post thar – pastor 5, missionary 15, nursing tutor 1 leh dialysis technician 1 hawn remtih a ni a; hnaruak hnawhkhah tura dilna – medical officer 4, general service (theologian post) mipa 1 leh hmeichhia 2, higher secondary lecturer 1 hnawhkhah remtih a ni.
Zirtawpni zan khan Pathian biak inkhawm neih a ni a, Rev PC Lalropuia hnen atangin thupui ‘Thilsiamte nena inpumkhatna’ tih ngaihthlak a ni.