Beidawngte karah beiseina nei awm

Beidawngte karah beiseina nei awm
Beidawngte karah beiseina nei an la awm a, ram hi siamthat theih a la ni tih ZPM zawm thar, sports journalist Lalnghinglova Hmar chuan a sawi.
Thawhtanni khan Lalnghinglova Hmar hi ZPM party-ah lawmluh a ni a. Thu sawiin, ram siamthat tak tak duh, beiseina nei tlat mipui, thalai leh kohhran rawngbawltu an tam em em tih sawiin, kan danglam dawn ti ngam leader Pu Lalduhoma kaihhruaina hnuaiah kumin kumtawpah sawrkar thar siam a, chuta tel ve thei tur leh ram tana ke ka a pen ve tur chu ka lawm takzet tih a sawi.
“Beidawngte karah beiseina nei tlat mihring tam tak kan la awm a, an ni pawh sawrkar se engmah tak tak an ni chuang loang, ti fotute hi mi beidawng an ni. Keini chuan beiseina kan nei a, ram hi siamthat theih a la ni; beiseina mei kan chhi alh zel dawn a ni,” a ti.
Tam takin tih tur an sawi thin a, ZPM pawhin tih tur tam tak a ruahman; chutihlaiin a tih ve loh tur an sawi a, chu an tih ve loh tur an tih chu ropui a tih lai chu a ni tih Mizoram Football Association hruaitu ni bawk Lalnghinglova Hmar hian a sawi. “Engvangin nge Mizote hi mite thil dil a, an koh sak leh tih sak ngaia kan la awm reng bik? Ngaihtuahsaktu leh koh sak theitu engtikah nge kan nih ve theih ang, tih hi ka rilru luahtu a ni,” a ti. Mizoramah ZPM lian takin a ding anga, India ram alhchhuak thei khawpin lian zawkin a insiam tur a ni tih a sawi.