Belarus president thlawp lo ngam Sabalenka

Tunhma lamin Belarus tennis player Aryna Sabalenka hian infiammi tumahin indo an thlawp ngai lo tih lo sawichhuak tawh bawk mah se Russia-in Ukraine a run thlawptu an ram president Alexander Lukashenko hming sawichhuakin, an thenawm ram run kawnga a ngaihdan a thlawp loh thu em hi chu khawvel hriatah a la sawi lang ngai lo a, Thawhlehni khan Lukashenko a thlawp lo tih a au-chhuahpui ve ta nge nge!
Politik chungchang zawhna chhan chakawm loh tak tak a dawn fo avangin French Open khelh mekah news conference a hmachhawn duh lo a, mahse, Ukrainian Elina Svitolina hneha semi-final a luh rualin kum 25 mi Sabalenka a tawngchhuak a, “Indona hi ka thlawp lo. Tun dinhmunah chuan Lukashenko pawh ka thlawp hek lo,” a ti.
Belarus president Lukashenko hi Russia president Vladimir Putin-a sangawizawnpui niin, sipai chakna hmanga Ukraine run kawngah pawh Putin a thlawp a, Ukraine runna atan an ram hman a remti bawk.
Belarus infiammi zinga langsar ber pawl Sabalenka hi nikum February thlaa Ukraine do a nih hnu khan an ram president laka inkharkhip tur leh an ram chet dan dona auchhuahpui tura nawr a ni fo a, infiammite tan indo thlawp chi a nih loh thu sawi mah se Putin thlawpa puih duhtu an ram president a thlawplohna em erawh a sawichhuak ngai lo a; French Open first round a paltlang hlim khan Ukrainian player Marta Kostyuk chuan infiammi ti mai loa amah, mimal ngeiin Ukraine run a dodal tih a sawichhuah duh loh avangin Sabalenka hi na takin a lo sawisel tawh a ni.
Sabalenka leh Lukashenko hi hmai-chhanah vawi duai lo inhmu tawhin, kum 2020 New Year’s Eve function-ah phei chuan thla an la dun nghe nghe.
Kum 2020 tir lam khan Europe khaw-chhak lam ram mipuite hian dik lo taka vote tihchingpen vanga inthlana tling ve chauha an puh president Lukashenko laka lungawilohna hi an lo lantir tawh hial a. chutiang taka mi rin-hlelhawm chuan dictator ang hiala inlarchhuak mek Putin a thurualpui thei a, Ukraine runnaah pawh Russian president a thlawp hmiah a, chu em em erawh Sabalenka hian a pawmpui theih loh thu a sawichhuak ve ta nge nge a ni.
Thawhlehni khan Sabalenko a tawng-chhuak a, “Vawi duai lo ka lo sawi tawh thin angin, indona hi ka thlawp ngai lo. Eng buainaah mah kan ram hi inrawlh lo se ka duh bawk. Ka dinna hi vawi tam tak ka sawichhuak tawh tih in hria e. Ka dinna in hria a, ka chhanna pawh in hre vek.
“Politika inhnamhnawih hi ka duh ngai lo. A chhan pawh tennis player mai ka ni a, kum 25 leka upa tennis player.
“Politik chu buaipui ila he hmunah hian hmuh tur ka awm hauh lo ang. Chuvangin politika inrawlh hi ka duh lo a, tennis player nih mai hi ka duh ber chu a ni,” a ti.
Tun hi karliamta Nilaini hnu lama pindan chhunga inkharkhip ni lo open news con-ference-a Sabalenka inlan vawikhatna niin, a hmasa pahnihah kha chuan a himna atan leh rilru lama a hriselna tur ngaihpawimawh vangin a inlan duh lo tih a sawi.
Karliamtaa news conference-ah khan Ukrainian reporter pakhatin Sabalenka hi Lukashenko a thlawp leh thlawp loh a zawt rawt rawt a, zawhna chhang duh loin, a himna a ngaihtuah tih a lo sawi tawh a ni.
News conference-a politik chungchang sawilang telin, “Press conference hi political TV show-ah a chang zo ta a, kei lah politik expert ni loin tennis player mai ka ni si.
“Ni hnih khat chu press conference atangin ka han bibo zawk a, han inngaihtuah vete pawh ka ngai a ni.
“Ka him zual ta deuh sawtin ka hria a, tumahin ka sawi turah thu an nei lo,” tiin an ram president a thlawp loh thu pawh a sawichhuak ve ta pap pap a nih hi!