Power hnehtu Luangmual

An inlan hmasak berah title cho phakin kai thar Luangmual an inlar a, Thawhlehni zan Tata SK Pro Volleyball League-ah 3-1-in Power Department Sporting Club an hneh.
R. Dengthuama In-door Stadium, Mualpuiah Nipa Barad leh Lalmuan-puii’n lehlam theihna an hliahkhuh hneh hle a, 25-19, 25-16, 20-25, 25-15-in Luangmual an chakpui.
Mizorama a inkhelh hmasak ber Ahmedabad tleirawl Nipa chuan point 31 vawchhuakin point 19 a hloh a, D3 Business Player of the Match lawm-man a dawng.
A kawppui Kolasib nula Muani’n point 21 hmuin point 11 a paih ve thung a; Power tan mimala thawhhlawk ber Vanlal-remruati’n point riat hmuin point thum a hloh.
Team pahnih player chet dan khaikhinin an inkhan lo a, an ball vuak a inthlauh bakah Luang-mualin danglamna siam thei player duhthlan tur an ngah zawk bawk a, Muani leh Nipa bakah R. Mal-sawmtluangi’n tihsual tum sarih nei mah se vawi 13 a vaw tla.
Luangmualin 2019 Pro Volleyball player tha ber Muani kawl mah se team tihchak leh zualna’n Guja-rat tan National Beach Volleyball silver leh Youth National Games Volleyball gold medal awrh tawh kum 18 mi Nipa an lalut a, an vawikhat telnaah chamion an tum tih an lantir.
Thla thara India Under 19 camp zawm tur Nipa hian team inbuatsaihna zawm tam hman lo chung-in tawnhriat nei Muani thlazar hnuaiah ngam-pa tak leh hmasawn zawngin ke a pen a, Power-in chhanglet thei tur khawpin theihna nei an kawl lo a, an dang hneh lo.
Set hmasa pahnihah nuam ti takin Muani’n a khel a, point 17 hlawhchhuakin tum li chiah a paih. Nipa chuan vawi 15 hlap tla mah se tihsual vawiriat neiin, a hniam zawkah a awm a, chuti chungin Luang-mualin an thunun hneh.
Engngemawchen club tihtawp a nih hnua intuai-thar leh Power-in kum 2000 hma lama hriat hlawh tawh veteran setter Lalropuii kokirin, an champion kum 2017-a rinrawl Vardingliani nen inkawp leh mah se an tha a thum tawh deuh. Set thumnaah erawh tawnhriat an neih chhawrin el tham an la ni tih an entir a, lehlam tlahniamin point 20 chiah an hmu ve hman.
Inrinni tlaiah champion lai Bethlehem Vengthlang nen an intawng leh dawn a, kar leh Thawhtanni tlai-ah Power-in Bungkawn an hmachhawn ve thung ang.