Muanawma tan silver medal Duhzuali leh Ponty tan bronze

Muanawma tan silver medal
Duhzuali leh Ponty tan bronze
March ni 16-23, 2025 chhunga Goa-a khelh mek Yonex-Sunrise 47th Indian Masters (Veteran) National Badminton Championship 2025 chu category thenkhat khelh zawh tawh niin, result hriat theih tawhah Mizo player pathumin medal an hlawhchhuak tawh.
Hlimen pa, Mizoram Police Badminton Club player Lalmuanawma chuan 45+ men’s singles-ah silver medal dawngin, 40+ women’s doubles category-ah Lalduhzuali (Durtlang) leh Ponty Lalramtluangi (Chaltlang)-te’n bronze medal an dawng bawk.
He tournament lianah hian kum 35 atanga kum 75 inkar category hrang hrang 45-ah inelna buatsaih niin, entry 2290 lai a lut.
Kum 35+ atanga 50+ inkarah inelna hi zawh fel tawh niin, 55+ atanga 75+ inkarah la kalpui chhunzawm zel a ni thung.
Muanawma hian unseeded niin 45+ men’s singles inelna hi bul a tan a; round of 64-ah KKS Pukhrambam chu 21-9, 21-17-in a hneh a, round of 32-ah Lakshmi Narayana P. chu 18-21, 21-11, 21-13-in a hneh leh.
Round of 16-ah seeded no 4 Ashish Sharma nen intumin 21-18, 18-21, 21-10 hnehna a chang a; quarter final-ah pawh seeded no 5 Yuvraj Dhayal chu awlsam tak 21-15, 21-8-in a hneh leh bawk.
Semi-final lamah Chand Chawat nen intumin, straight set (21-12, 21-12) bawkin a chak leh a, final a lut.
Final-ah hian seeded no 1 leh India tana Olympic pawh lo khel tawh Abhinn Shyam Gupta nen an intum a; first game 23-21-in a hloh a, second game an khel tan leh chiah tihin inhliam vangin a khelh chhunzawm thei ta lo a, silver medal a lak phah ta a ni.
Champion zo ta lo mah se kumin September thlaa Pattaya, Thailand-a nghah tur BWF World Senior Championship-ah India aiawh tura thlan a ni.
Hetih lai hian, Duhzuali leh Ponty-te pawhin unseeded niin tournament an hmachhawn a; round of 32-ah 21-12, 21-18-in, V. Mehta leh Kiran Shete-te inkawp an hneh phawt.
Round of 16-ah Poonam Bali leh Nidhi Chauhan-te tangdun chu straight set bawk 21-15, 21-15-in an hneh leh a, quarter-final an lut.
Last eight-a an tumpui Jjimlu Ama leh Kamsar Yane-te phei chu awlsam lehzual 21-6, 21-6-in an hneh a ni.
Semi-final erawh an khirh ta a, tournament-a seeded no 1 Sandhya M. leh Sangeetha Mari-te lakah 6-21, 17-21-in an vanduai a, bronze medal an dawn a ngaih phah ta a ni.
Tunah hian category thenkhatah match khelh mek zel a ni a, Mizoram atanga kal player engemawzatin inelna an la hmachhawn mek a, result duhawm dang pawh la awm leh thei a ni.
Mizoram Badminton Association chuan an player, hlawhtlinna changte a lawmpuiin, a chhuang takzet tih thuchhuah siamin an tarlang a; chutih rualin lawmman dawng pha ta chiah lote pawhin theihtawp chhuaha tournament an hmachhawn chu hlu an tih thu leh an hmalam hunah hlawhtlinna sang zawk leh ropui zawk an la chan chhoh zel theih an beisei a, duhsakna an hlan nghal bawk.