Belgium squad-ah City player pahnih
English top-flight title la hlimhlawt Manchester City chuan Euro 2024 khel tur Belgium squad hmasaah player pahnih thawhin, chu’ng mite chu Kevin de Bruyne leh Jeremy Doku an ni a; Real Madrid goalkeeper Thibaut Courtois chu tel lo langsar a ni thung.
He provisional 25-man squad-ah hian Premier League star dangte pawh an lang nual a, chu’ng zingah chuan Arsenal star Leandro Trossard, Aston Villa mi Youri Tielemans, Everton midfielder Amadou Onana, Leicester City player Wout Faes leh London club Fulham tana khel Timothy Castagne an tel.
Atletico Madrid defender Axel Witsel chu kum 35 mi lai ni tawh mah se mak takin la belh leh tur squad hmasaah hian telh a ni a, nikumah international football a chawlhsan thu puang tawh mah se head coach Domenico Tedesco chuan a ko zui ta tho a ni.
Chelsea atanga AS Roma lama loan-a khel striker Romelu Lukaku pawh Germany-ah kan la hmu leh dawn a, an record goalscorer tel loin tournament liana Belgium hmuh an la rem rih lo a ni!
Ram atan game 102 zet khel tling tawh Courtois erawh khup hliam khirh tak avanga season liamta pumpui inkhel thei lo tluk a nih hnuah khelmual lut chho leh thei tawh mah se Euro khel tur meuh chuan manager-in a la ring zo lo deuh a nih hmel a, chutih laiin Real tan Inrinni Champions League final-ah Borussia Dortmund a hmachhawn rin a ni.
Thla hmasa mai khan boss Tedesco chuan kum 32 mi Courtois a thlan loh chhan sawifiahin, player insawiselna nei lo leh damchiang val lo tan squad-a tel a rem loh thu a sawi.
Tedesco hian tawnhriat ngah tawh Chelsea goal-veng hlui aiin Wolfsburg keeper Koen Casteels, Luton goalkeeper Thomas Kaminski leh Nottingham Forest keeper Matz Sels lam a hawisan ta zawk rih a ni.
Belgium boss hian nikum June thla khan Courtois hi captain mawhphurhna a chan loh vanga lawm lo leh squad-a kohna chhang duh loah a lo puh tawh a, sawi tur tingin damkawr a lo ni bawk nen Euro 2024 khel tur squad-a Madrid keeper a lang ve ta lo pawh hi an boruak hrechiangtute tan chuan a mak lutuk lo mai thei!
Chutih laiin heti zawng hian Tedesco chuan Thawhlehnia media a hmachhawnah chuan a sawi hran chuang lem lo a, “Courtois hi pa tumtlang leh rinawm, a dinnaa chiang a ni a, a lak atanga information kan dawn hnuhnungberah chuan European Championships khel turin a la inpeihchhuak famkim lo tih a ni a, amah hi a taksa dinhmun hrechiangbertu a ni,” a ti.
Squad thehluh hun atana Uefa deadline siam June ni 7 liam hmain Belgium hian squad-ah player pakhat an la thunbelh thei a, squad-a tel thei zat tur sang ber player 26 hi va ti tling kher lo mai ang an tih pawhin an thu a ni tawh ang.
Belgium hi Group E-ah Romania, Ukraine leh Slovakia-te nen awmhoin, June ni 17 khian Frankfurt khuaah Slovaks hmachhawn chungin tournament bul an tan ang.
-- Advertisement --
Belgium squad
Goalkeepers: Matz Sels (Nottingham Forest), Koen Casteels (Wolfsburg), Thomas Kaminski (Luton)
Defenders: Wout Faes (Leicester), Timothy Castagne (Fulham), Arthur Theate (Rennes), Jan Vertonghen (Anderlecht), Axel Witsel (Atletico Madrid), Zeno Debast (Anderlecht), Thomas Meunier (Trabzonspor), Maxim De Cuyper (Club Brugge)
Midfielders: Aster Vranckx (Wolfsburg), Youri Tielemans (Aston Villa), Orel Mangala (Lyon), Kevin De Bruyne (Manchester City), Arthur Vermeeren (Atletico Madrid), Amadou Onana (Everton)
Forwards: Romelu Lukaku (Roma), Charles De Ketelaere (Atalanta), Jeremy Doku (Manchester City), Lois Openda (Leipzig), Leandro Trossard (Arsenal), Johan Bakayoko (PSV Eindhoven), Dodi Lukebakio (Sevilla), Yannick Carrasco (Al-Shabab)