Belgium tlawmna thlentu handball kha…

Belgium tlawmna thlentu handball kha…
Thawhtanni zan Euro 2024 Group E match pakhat zawkah an aia Fifa ranking-a 45 ngawta hniam zawk world number 48 Slovakia lakah sikhat faiin ranking-a pathumna luahtu Belgium an tlawm a, he inkhela Romelu Lukaku goal tur dangtu hnuhnung zawk Lois Openda ‘handball’ khan sawi zui a hlawh a, tun tournament kal laia inhnialna thlen thei thil thleng (controversy) kan hmuh hmasakber a ni.
Belgium ‘golden generation’ an tiltiak zo titih tawh a, player naupang zawk (young talent)-in hmun tam zawk an luah takna Belgium team thar an tih mai chu Germany ram tournament kal laiah hian thui tak han thleng tura beisei ni chiam lo mah se Frankfurt Arena inkhelah na na na kha chuan mite rinkai zawk an ni a, an group-ah pawh tlang thei tura mite beisei an ni.
Ivan Schranz chuan Manchester City player Jeremy Doku tihsual hlawkpuiin tan atanga minute sarihna lekah Slovakia hmahruaina goal a khung a; Belgium tana goal khung hnem ber ni mek Lukaku chuan tum hnih ngawt goal khung mah se video assistant referee (VAR) endikna pahnih a paltlang zo lo ve ve, a hmasa zawk Amadou Onana chhawpsak atanga a tauhluh chu offside vanga hnawlsak niin, Belgium lamin sawinawi tur an nei lo a, mahse, a hnuhnung zawk erawh inhnialna chawkchhuaktu a ni zui ta a ni.
Belgium substitute Lois Openda chuan feet 6 leh inchi 3 zeta sang Slovakia defender Denis Vavro nen ball an inchuhna lamah a kut hmawrin ball a tawk fuh meih niin a lang a, tunlai thiamna thar ‘snicko’ technology an tih hmanga ennaah pawh a ‘handball’ ni chuan a lang a, mahse, ball kal lai a tibuai loin a lang a, khelmual sira monitor atang lo phei chuan stadium chhunga mipui kha zozai leh TV atanga inkhel entute chuan a kutin ball a tawk fuh tih pawh an hre kher lo mai thei.
Chu thil thlen rual deuh thawa a ball pek phei hmangin Belgian mihang palian Lukaku chuan chiang zetin an siphurh a sut a, hun pangngai tawp dawn ruai a nih tawh avang leh a hma lama a goal tauhluh pawmsak a nih tawh loh avang te, a chance tha tak tak dang a lo bawhpelh tawh avangtein Lukaku goal lawm hi hmuhnawm ti tana hmuhnawm tak tur a ni ang a, Belgin fans thawm pawh a ring.
Turkish referee Halil Umut Meler chuan VAR nen inberawnin thil thlen dan a endik a, Lukaku goal tur siamsaktu Openda ‘handball’ avang chuan a vawihnihna atan Belgium striker goal tur a dansak leh ta a, tah chiah khan inhnialna leh sawisep a chhuak zui ta a ni.
Football danpui (Laws of the Game)-in handball a hrilhfiah dan chuan ‘goal thun tuma attacking player a insingsak lai takin a banin ball tawkfuh se la, ball-in a kut a fuhna lai emaw tihluih leh tihpalh a ni emaw a handball dan dang reng reng emawin kori a tu lo a, chuti anga handball chunga goal thun a nih chuan pawmsak loh tur’ tih a ni khawng bur mai!
Ni e, Belgian substitute kut khan ball zawng a fuh ngei niin a lang a, football danah chuan ham ngei tur ni chuan a lang a, mahse, nikum mai khan UEFA chuan handball ham leh ham loh chungchangah hian va khawih luih ngawng ngawng ni lem loa ball-in a per palh a nih chuan football dan khauhpui awmsa chu khawng taka kalpui loh ni se tiin a duhdan a lo puang tawh a; Openda pawh kha defender Vavro hmakhalha long ball chan a tum ruh lutukna lamah a theihna zawng zawng nena hmalam a pan laiin ball lo tla kha a va nangching mai chauh niin a ngaih theih a, ball a tawkfuh avang khan ball chet dan a danglam phahin a lang lo a, ball a chan theihna kawngah a chan a tihthat phah pawhin a lang lo a, TV replay khawiah mah chiang takin ‘advantage’ a neih phahna hmuh tur a awm lo.
Khati a nih avang khan ham kher ngai loa ngaihna a lian a, referee thutlukna khan sawisel a hlawh phah a, a duhthawh zual chuan tun tournament kal meka ‘refereeing decision’ chhe berah an puan phah hial a ni!
English radio analyst Dean Ashton chuan, “A dik thei ngangin ka hre lo. A dik lo ngawih ngawih. 6ft 3in defender nen ball an inchuh tih kha hre reng ila,” a ti.
Belgian-born Rangers forward Cyriel Dessers pawhin Belgian television hnenah, “Kha thil thleng khan a chan a tihthatna hmuh tur a awm miau loh avangin handball-ah ka ngai thei bau lo. A na takzet a, a zahpuiawm bawk,” tiin referee thutlukna a sawisel.
Chelsea striker hlui Chris Sutton pawhin a thutna hmun BBC Radio 5 Live pindan atangin, “Dan mit leh thinlung beng atang pawhin a pawm theih loh a, kha thutlukna kha nuihsawh chi a ni.
“Openda khan a hma zawna kal turin ball kha a va khawih lui a nih miau loh avangin referee-in a ham ta mai kha a rawng ngawih ngawih a, Premier League chu ni se kha goal kha pawm a ni ngei ang,” a ti.
ITV Sport referee analyst Christina Unkel ve thung chuan, “Tum reng vanga handball luih chungchang sawifiahna hi tunhnai khan tidanglam bawk mah se tun kha chu tihluihah a ngaih theih a, a chhan pawh a kut kha a koki zawn thuakah a tawlh chho a, ball thunun turin a ban kha hmalamah a tiphei ngei a ni,” tiin referee thutlukna a chhan thung.
Belgium head coach Domenic Tedesco chuan inkhelh ban press conference-ah referee thutlukna chungchang a sawi zui duh lo a, “Tunah khan kan chak lo a, fair taka chak loh mai duh mi ka ni a, he subject hi khel zui ka tum lo a, ngaihdan sawi zui chiam pawh ka duh lo,” tiin ngawih a chuh.
Tun kha Tedesco hnuaia match 15 an khelh tawha Belgium tlawm vawikhatna niin, Slovakia game-a goal thun theihna hun remchang tum 16 zet nei chunga goal khat pawh an kung loh chungchangah Domenico Tedesco a tawngchhuak zui a, “Kha match khelh hma khan kan tlawm palh thei tih kan inhria a, vanduaithlaktakin, vawiin hian kan chak lo ta chiah reng a; ni e, big chance chu kan siamchhuak nual alawm, kan nawrin, kan chak thei tih kan hria a, a khelhah pawh kan chungnung a, kan chance neih tha tak tak kan hloh leh thin kha kan tuar a ni,” tiin an tlawm dan a sawi.
Belgium boss hian Frankfurt khuaa an tlawm dan kha amah leh team tan na hle mah se football game peng pakhat a nih thu leh tihsual nei miah loa goal thun a theih loh thu sawi chungin thil thleng ve thei reng a nih thu leh Slovakia pawhin tihsual an ngah thu a tarlang a, kha vang taka anni lam pawhin goal khung thei tur an nih laia an chefuh zo lo an tuar niin a sawi a, result tidanglam dawrh theitu tur a nih avangin tihsual (handball) chungchang pawh khan an sawi nasa bik mai chauh a nih thu a tarlang tel.
A chunga tarlan Sutton kha chuan VAR thutlukna dik a ti thei lo a, chutih rualin Lukaku khan a hmain goal thun theihna hun remchang a nei tha tawkah a ngai a, Golden Boot pawh dawng thei hial tura ngaih a nih laia tum thum ngawt chance tha lutuk a bawhpelh ringawt kha a dem a; Slovakia lam kha chuan chance pawh an siamchhuah tam zawh loh thu leh Belgium kha an chakna tur bawhpelhah a puh.
2022 World Cup group-stage paltlang zo lo Belgium hian major tournament-a shot vawi 47 an neihah goal an khung zo lo fai vek a; tun kha kum 1980 hnu lama Euro game bika chance lian bik vawili an hlahna chiah a ni.
Slovakia tan tun kha an history-a world top three ni pha chin an hneh vawikhatna niin, tawpna hamrik a rik rualin khelmualah Slovakia substitute leh staff rual an chimlut huk a, an supporter-te hmaa inkaihkuah kual chungin chak an lawm.
Lukaku bakah Manchester City star Kevin de Bruyne cuan captain ni chungin lehlam pawl tan hlauhawm a siamchhuak fo a; Slovak goalkeeper Martin Dubravka-a petchhuah chhe tak la fuhin Arsenal player Leandro Trossard pawhin goal kham chungah a thawnchhuak ve bawk.
Slovakia tan Lukas Haraslin pawhin khungbelh theihna hun remchang zet hmu mah se Belgium kepeer Koen Casteels chuan a dansak ve bawk.
Tarlan tak angin, Belgium team tharah hian Eden Hazard leh Toby Alderweireld tihte hmuh tur an awm ta lo a; tun kha kum 2002 hnu lama Real Madrid goalkeeper Thibaut Courtois tel loa major tournament match an khelh vawikhatna a ni nghal bawk.
Inrinniah Belgium hian sithum faia Ukraine sawptu Romania an tum leh dawn a, Slovakia leh chak mamawh dang Ukraine an inhmachhawn ve thung ang.