Bengal-a Waqf dan duh loh lantirnaah mi 150 man tawh

Bengal-a Waqf dan duh loh lantirnaah mi 150 man tawh
West Bengal hmar lam, Murshidabad district-ah chuan Waqf Amendment Act duh lohna lantirnaah tharum thawhna nasa tak thlengin mi pathum thi an awm tawh a. Mi 150 chuang man an ni tawh.
Murshidabad hi tun hnaia parliament-in a pawm tak, Waqf thilte enkawltu tur tihdanglamna lian tak, Waqf Amendment Bill, duh lohna lantirna nasatna ber pakhat a ni mek.
Suti, Dhulian, Samserganj leh Jangipur-ah a nasa zual a. Police chuan Pathianni kha chuan boruak thunun tawh a nih thu leh punkhawm khapna tihchhuah a ni tih an sawi.
Calcutta High Court chuan central force dah turin a ti a. Court hian Inrinni khan boruak chu ‘a tha lovin thunun harsa’ a nih thu a sawi a. “Constitutional court-ten mipuite a tingawi thei lo va, mipuite dinhmun hlauhawma an awm loh nan venhimna pek an ngai,” a ti.
Chief Minister Mamata Banerjee chuan tharum thawh lo tura ngeiin hetiang thil thlentute hian khawtlang an tina niin a sawi a. An state ni lovin, sorkar laipui chu he dan avanga hetiang thlentuah a puh bawk.
Banerjee-i hian an party chuan Waqf Amendment Act hi an duh lo tih a sawi nawn leh bawk.
Bengal Assembly-a Leader of Opposition Suvendu Adhikari-a chuan tharum thawhna thleng avang hian Hindu 400 chuangin an in leh lo an chhuahsan niin a sawi a. “Bengal-a sakhuana avanga intihduhna hi a thleng chiang a ni. TMC-in hetiang thil hi a tichhuak a, Hindu-te chu zawn an ni a, kan mite chu an him nan an ram ngei an tlanchhiatsan a ni,” a ti.
Bengal Governor CV Ananda Bose chuan tharum thawhna thleng chu tha a tih loh thu leh Calcutta High Court thupek chu tha a tih thu a sawi a. “High court lo inrawlha a hun taka thutlukna dik tak a siam hi ka lawm hle a ni,” a ti.
Muslim tamna, Murshidabad district-a dan siam thar duh lohna hi April 8 atanga intan kha niin lungin police beih an ni a, police lirthei hal a ni bawk a. A hmain an khawpui, Kolkata telin hmun hrang hrangah dan duh lohna lantir a ni bawk.
West Bengal DGP Rajeev Kumar-a chuan state sorkar chuan inhawr khawma pawikhawihna chu dim lo turin a ti tih a sawi a. Dan duh lotute hi an pungkhawm a, a hnuah vantlang bungrua suasamin sakhua leh sakhua inhuatna zawngin an kal zui ta niin a sawi.
Waqf Amendment Act duh lohna hi Banerjee-i sorkar tan pawh chona lian tak a ni thei dawn a, nakum maiah assembly inthlan an nei dawn a, a zawna vawi li nan chief minister nih tum leh mek a ni.
Bengal-ah hian a hma lawkin zirtirtu 26,000 chuangin lungawi lohna lian tak an lo lantir tawh a, heng zirtirtute hi lak dan fel lo a tam avangin supreme court-in lak an nihna a hnawlsak vek vanga lungawi lo an ni.
Tripura hmar lama Unakoti district-ah pawh Inrinni chawhnua Waqf dan thar duh lohna kawng zawh huaihawtah police eng emaw zatin hliam an tuar bawk.
Kailashahar Joint Action Committee huaihawt kawng zawh hi Tilabazar atanga kalin Kubjhar pan an ni a, police phalna pawh la hmasa lo an ni.
Kubjhar an thlen dawn hian tuten emaw pheikhawkin an lo vawm a, boruak tang zuiin dan tumin police an inrawlh a. Brick, lung leh glass umin nasa takin police hi an vawm a. Sub-Divisional Police Officer (SDPO) Jayanta Karmakar, Police Inspector Jatindra Das leh officer dang tam tak an inhliam.
Police dang thlen belhin tiang nan mipui hi an hmachhawn a, an um darh thei a, boruak pawh thunun zui a ni.
Waqf (Amendment) Bill, 2025 hi parliament rorelna in hniha nasa taka inhniala pawm a nih hnuah April 5 khan President Droupadi Murmu-i pawhin a hming ziah hnanin dan a ni tawh.