Bengaluru-ah opposition meeting nei mek

Nimin khan Bengaluru-ah Opposition party-te chuan Lok Sabha inthlana BJP te hneh an nih theih nana lungruala chetlak an tumnaah inhmuhkhawmna an nei leh.
Tun hi tun hnai thla hnih chhunga inhmuhkhawm an neih tum hnihna niin Opposition party hruaitu lawk ber ber te an tel a ni.
Thla kalta khan Patna khawpuiah inhmuhkhawmna neih ni tawhin anti-BJP political front din tuma hmalakna kal zel a ni a. Tuna Bengaluru-a meeting hi a tirah chuan Shimla, Himachal Pradesh a neih tum a ni a, mahse, khawchin avangin hill state atangin Bengaluru ah sawn a ni ta zawk a ni.
Tun meeting an neih hian pawimawhna thuk tak a nei dawna ngaih niin opposition te hian seat insem dan tur te, common programme kalpui dan tur te Centre a BJP sorkar hlawhchhamna aupui dan tur te an rel tel dawna ngaih a ni a.
Hetih lai hian BJP kaihhruai National Democratic Alliance (NDA chuan insiamthatna kalpui ve mek thungin July 18 vek khan New Delhi a five-star hotel-ah an thawhpuite nen meeting an nei ve tho bawk.
Congress party chuan Opposition unity chu Indian politic-a kal velah ‘game-changer’ tur tiin an sawi a. Congress hruaitu lawk Jairam Ramesh chuan press conference a neihnaah Prime Minister Narendra Modi chuan NDA a hre chhuak thar thut tiin a sawi a. “NDA tharthawh that an tum a. A hma zawng chuan NDA an sawi ngai lo, tun hnai ni rei lo te chhungin an sawi thar leh a, rang tak maiin meeting an ko zui nghal a. NDA chu thlarau ang mai ni tawh niin nunna thar pek leh an tum a ni,” tiin Ramesh chuan a sawi.