Bengaluru in final an lut

March 12, Pathianni zan khan India Super League (ISL) play-off semi-final thawhhnihna khelh a ni a. Inkhel hmuhnawm takah Bengaluru FC chuan Mumbai City FC an hneh a, final an lut.
ISL champion hlui Bengaluru FC hian ISL 2022-23 ah League champion Mumbai City FC hi semi-final thawh khatnaah si khat faiin an lo hneh tawh a. Pathianni zanah 2-1 in tlawm mah se si belhkhawmah 2-2 in an inhnehtawk. Si belhkhawmah chak zawk an awm theih loh vangin penalty shoot out hmangin chak zawk zawn a ni a, Bengaluru FC chuan 9-8 a hnehna changin, final an lut ta a ni.
Semi-final thawh khatnaah si khat faia chak tawh Bengaluru hian Mumbai City FC lakah bul an tan tha a, minute 22-naah Javi chuan hmahruaina goal a thun. Javi goal thun vang hian si belhkhawmah 2-0 in hma an hruai a, final lut turin an dinhmun a tha viau tawh. Goal an chhuah hnuin Mumbai team an khel tha ta tlat thung a, minute 31-naah Bipin Singh chuan goal thunin an si phurh a sut then.
Chawlhlawk hnu lamah Mumbai in an khingpuite an nawr chhunzawm zel a, mi-nute 64-naah Mehtab chuan goal thunin an si phurh a sut zo ta nge nge. 2-2 a an inhnehtawk hnuin inkhel a hmuh-nawm leh zual a, final luh ngei tumin team hnihten tan an khawh nasa hle. Inkhel hmuh-nawm takah si nghak pahnih Phurba Lachen-pa leh Gurpreet Singh Sandhu te an che tha dun viau a, si nghak pahnihte hi inkhel tihmuhnawm lehzualtu an ni. Hun pangngai leh hun pek belhah chak zawk an awm theih loh vangin tie-break hmangin final lut tur zawk zawn chhunzawm a ni.
Bengaluru leh Mumbai City FC tana pettu ten an pet tha duh viau a, chak zawk an awm lawk thei lo. 8-8-a an inhnehtawk laiin Bengaluru si nghak Gurpreet Singh Sandhu chuan Mehtab Singh pet a dang a. Chak theihna hun tha an neih lai hian defender tawnhriat ngah Sandesh Jhingan a lo penchhuak a, chiang taka pet goal in Bengaluru FC chuan final an lut zui ta a ni.
ISF semi-final thawh hnihna hi thawhtan zan khan Hyderabad FC leh ATK Mohun Bagan ten an khel a, he ta chak zawk zawk hian Bengaluru FC an hmachhawn zui leh ang.