Bengngawngte Ni pualin bengdar mamawhtute pe
Khawvel puma bengngawngte pual Ni, World Day of the Deaf Day chu Thawhtanni khan Aizawlah hman a ni a. Bengdar mamawh zirlai thlanchhuah 320 hman turin bengdar tha chi, pakhat Rs 20000 chuang man, a vaia belhkhawm cheng vaibelchhe 6.4 man, COAL India Limited hnuaia corporate social responsibility (CSR) atanga Deen Dayal Sravana Foundation (DDSF) Andhra Pradesh-in a lak chhuah chu sem nghal a ni.
Hemi puala Raj Bhavan-a hun hmanah larsap Dr Hari Babu Kambhampati chuan zirlai zinga beng lama harsatna neite tana thil tangkai, COAL India Ltd hnuaia CSR kaltlanga hmuh a nih theihna atan thawktu DDSF chungah lawmthu a sawi a. Mizorama zirilai beng lama harsatna neite zawn chhuah kawnga hma latu Helath minister leh department hotute chungah lawmthu a sawi bawk.
Andhra Pradesh-ah a thlawna bengdar sem a ni tih a hriat veleh Mizorama sem a nih ve theih nan theihtawp a chhuah nghal tih larsap hian a sawi a. Mizoram Health department hotute a sawipui hnuin World Day of the Deaf pualin sem theih a lo ni ta tih a sawi. Beng lama harsatna tawkte chu khua leh tui ten kan theih angin kan tanpui a ngai tih a sawi a ni.
Health minister Dr R Lalthangliana pawhin larsap thahnemngaihna zarah zirlai beng thalo te tana thil tangkai tak tih a ni chu lawmawm a tih thu a sawi a. DDSF chungah lawmthu sawiin, Mizoramin a mamawh anga hmalakna huang zauh zelin turin a sawm a ni.
Larsap hian Redeem Garden & Ephatha Special School atanga school naupang thlanchhuah 21 bakah Ephatha Special School naupang 4, an vaiin naupang 25 hnenah bengdar a sem a. Hemi rual vek hian DHME office MINECO-ah bengdar vuah ngai 177 dangte hnenah an measurement (Ear Mould Inpression) lak a ni a. Aizawl district leh a hnaivaia district dang atanga bengdar vuahsak turte measurement lak sak hi – Aizawl East ah 103, Aizawl West 8; Kolasib 32, Mamit 11, Saitual 1, Serchhip 22 an ni.
September 27 hian Lunglei 36, Hnahthial 4, Lawngtlai 24 leh Siaha 1, a vaiin mi 65-te ear mould impression tihsak an ni ve leh anga, Champhai 67 te tan hun remchang hmasa bera neih ve leh tur a ni. Heng hi zawhfel a nih chuan bengdar pek tur hi mi 334 an tling thei dawn a ni.
ENT surgeon Dr Lalramnghaki sawi danin:
4Bengngawngten khawtlangah chanvo leh pawimawhna an neih, an harsatna hrethiama anmahni pawmthiamtu kan nih a pawimawh.
4Chu’ng thilin khawtlang leh ram pum huapa rah duhawm a thlen ngei theih nana tan lak a pawimawh.
4Bengngawngte eizawnna ngelnghet ngaihtuah a, an hriselna ngaihpawimawh sak, hun harsa a lo thlena venhim leh chhawmdawl dan bakah an danglamna a tul anga thliar hran sak thiam a pawimawh.