Berlusconi thih hnuah a hmun ruak zau hle

Italy chuan prime minister hlui Silvio Berlusconi sunna an nei mek a. Cruise singer pawh lo ni tawh leh politics lama tawnhriat nei hauh lova Italy kaihruai thei leh media empire turu tak dintu Berlusconi khan nupui leh ngaihzawng pawh a ngah nameuh mai.
Nilaini khan Berlusconi vuina chu Archbishop of Milan chuan grand cathedral-ah a nei a. Italy chuan ram pum huapa sunna a nei bawk a ni.
Italian leh European flag te chu public building-ah a ngul chanvea zar vek niin prime minister ni lai pawh ni lo sunna ropui tak a ni a. State funeral phei chu Pope emaw war hero emaw minister ni lai emaw te tan bak kalpui a ni ngai lo.
Milan khawpui chu Silvio Berlusconi nena inzawmna thuk tak nei niin a pianna khua a ni a, a career bultanna a ni a, vaccum cleaner hralha bultan mai a ni bawk.
Milan main square-ah Maxi-screen siam a ni a, mi sang tam tak pungkhawmin thlahna hnuhnung an nei a.
A damlai khan Berlusconi khan empire turu tak dinin chung zingah chuan media, real estate, finance, cinema leh sport te pawh tel vekin political party thiltithei tak din bawkin tuna Italy sorkarah pawh an tel mek bawk.
Italy-a mihausa ber te zinga tel pha niin Forbes chuan a hausakna chu 6 billion pound hu velah a chhutsak a.
Mahse, a thih hunah a sumdawnna empire te chu tu nge enkawl dawn tih a sawi lang ngai miah lo va, chumai bakah a party din Forza Italia hma lam hun pawh chiang lo hlea ngaih a ni bawk.
Berlusconi hian a nupui hmasa lakah fa pahnih a nei a, a pahnihna lakah fa pathum neiin an vai hian a fate hi a holding company Fininvest ah chanpual lian tak an nei vek a ni.
Fininvest-ah hian Berlusconi hian 61% stake lai neiin engtiangin nge sem darh a nih dawn tih pawh a la chiang chuang lo va. A fa hmasa te pahnih Marina leh Pier Silvio, kum 1990 chho atanga management lama a tah luh tawh te chuan an insem mai dawn em ni tih te chu zawhna a ni.
Ro thil hlu tam tak la nei teuhin chung zingah chuan luxury villa thahnem tak a nei bawk a, chungte chu a fate semdarhna lamah pawh buaithlak tak la ni theia ngaih a ni a.
Milan hmar chhak lama Arcore a villa San Martino chu 3,500 sq m laia zau niin kum zabi 18 laia sak daih tawh kha a ni a. Hei bakah hian Lake Maggiore ah in a nei a, Rome, Cannes leh Caribbean te bakah hmun dang dangah in a nei bawk.
Berlusconi in property a neiha hlu bera ngaih chu kum 1970 chhova a lei Sardinia a Villa Certosa chu a ni.
He villa-ah hian world leader hrang hrang Vladimir Putin atanga George W. Bush te pawh a mikhual tawh a. Room 126 lai awmin theme park a nei a, chutah chuan fake volcano te pawh awmin a hlut lam hi 259 million pound vel laia chhutsak a ni.
Berlusconi chu a fate inlungruala siama huikhawmtu ber tia sawi a ni a. A empire enkawl chhunzawm turah pawh engmah inhnial buaina awm rin a ni lo va, a fanu upa ber kum 56-a upa leh Berlusconi hnaih bertu a ngaih Marina chuan a enkawl chunzawm rin a ni.
Mahse zawhna awm ta ber zawk chu amah Berlusconi ber a thih tawh chuan a business empire chu a hlu chhunzawm zel ang em tih a ni zawk a.
A thihna chu a political party tan channa nasa tak ni bawkin Berlusconi tel lo chuan Forza Italia chu a dam chhuak zui zel thei ang em tih chu zawhna lian tak a ni bawk.
Berlusconi kha populist leader niin a party din pawh ama mimal behchhan a ni ber a. Mahse, a awm tawh loh hnuah pawh a party chu a la awm zel ang tiin a right-hand man leh Italy foreign minister Antonio Tajani chuan a sawi.
Italian tam tak Forza Italian thlawptute chuan Berlusconi avanga an thlawp a ni a, amah ber a awm tawh loh takah chuan amah thlaktu turah buaina an nei ngei dawna ngaih a ni a. Party member te chuan thutlukna siam kawngah Berlusconi family te an biak rawn rin a ni bawk.
A fa upa pahnih Marina leh Pier Silvio te chuan an pa hnung zuiin politics an luhchilh duh ang em? Nge Forza Italia sum bawm ber an nihna chu phihthlain an kalsan zawk ang tih te chu zawhna a ni bawk.
Sum lama puihna tel lo chuan Forza Italia te chuan kal zel ngaihna an hre dawn lo va, Berlusconi chu an sum bawm ber niin a party tan hian 100 million chuang sum a thawh tawh tia sawi a ni.
Marina chuan a thlak dawn tih thawm a awm a, mahse, amah chu behind-the-scene operator an tih ang chi zawk a ni tih a ni bawk a.
Berlusconi thlak thei pakhat chu a partner amah aia kum 53-a naupang Marta Fascina a ni a, MP ni mek niin a tuina ber chu politics bakah Silvio Berlusconi thlazar hnuaia seilian a inti.
Mahse Berlusconi fa upa ber Marina chuan nikum lam khan a pa nena inneih an tumna chu a hnawlsak tia sawi a ni a. Hei vang hian Fascina hmalam hun zel tur pawh a chiang chuang lo tia sawi a ni.
Thil chiang tak awm erawh Forza Italia chu a kehchhia a nih chuan Prime Minister Giorgia Melini coalition sorkar tan a pawi em em thung dawn tih a ni. Berlusconi thihna chuan politics lama ngelnghehlohna a siam nghal der a.
Italy chu political crisis in a nuai reng niin sorkar tlukchhiat reng rengna a ni bawk a, tunah pawh coalition sorkar mekna a ni bawk.
Tun thlengin Berlusconi fate chuan sawi an la nei lo va, lohtheihlohin an pa thihna avangin a empire kalsan an enkawlna kawngah mipui nawlpui hriata an inpholan pawh ngai thei a ni. Berlusconi chu hun rei tak damlo tawh a nih avangin a fate chuan thil awm thei ang an chhut thlip thlep sa ang tia ngaih a ni thung.