Beyonce billionaire a ni ta

Beyonce billionaire a ni ta
Forbes-in a tarlan danin Beyonce chu khawvela mihausa tawntaw, billionaire a ni ta a, musician zinga billionaire ni thei pangana a ni. Forbes report thara a lan danin Beyonce hlutna hi dollar tluklehdingawn a tling ta a, tihian a pasal Jay-Z, Taylor Swift, Rihanna leh Bruce Springsteen te hnung zuiin, musician zinga billionaire ni thei pangana a ni ta a ni. Forbes ni lo, outlet thenkhat chuan Paul McCartney, Andrew Llyod Webber leh Selena Gomez te pawh billionaire niin an tarlang a, an tehna (criteria) hman a inang lo ve thung.
Grammy pawh 35 dawng tawh Beyonce hian kum 2025 a khar tha hle a, kum tawp rual khan Forbes list tharah billionaire zingah rin luh a ni a, 2025-ah khan tour atangin sum a la lut tam hem hem hle a, Cowboy Carter tour a neih atangin dollar maktaduai 407.6 la lut theiin, ticket pawh maktaduai 1.6 chuang a hralh thei a, Forbes chuan 2023-a Beyonce Renaissance World Tour bakah Beyonce sumdawnna dang Cecred leh SirDavis Whisky te chu tuna billionaire a nih theihna chhan pakhat niin an tarlang bawk. Hetihrual hian a sum hmuhna lian ber chu music a ni.
Beyonce hian rimawi piah lamah sumdawnna dang a nei nual a, 2010 khan Parkwood Entertainment company a din a, hemi kaltlang hian a music, performance, tour leh visual media product zawng zawng management leh production te ama kutah a lut vek a, hei hian rimawi atanga a hlawkna dawn pawh a tipung nasa lehzual a ni.
December 2023 khan Beyonce hian kum khat thil thuah a hlutna chu dollar maktaduai 500 atanga maktaduai 800 kaipuiin, thawm a lo nei hak tawh a, hei hi a Renaissance World Tour rah a ni pakhat.
Rimawi khawvelah hmeichhe group Destiny’s Child chu bul tan nana hmangin, 2003 atangin a mal kal ta a, solo studio album pariat tichhuak tawhin, a album te hi Billboard 200 (US albums) chart-ah No.1 a kai thei vek a, Billboard Hot 100 (US singles) chart-a No.1 kai thei hla pakua a nei tawh bawk.