Beyonce leh Jay-Z ten Malibu-ah in $200 M-in an lei

Beyonce leh Jay-Z ten Malibu-ah in $200 M-in an lei
Beyonce leh Jay-Z te chuan Malibu, Califirnia-a Paradise Cove area-ah in lian leh manto zet mai an nei lei thar a, TMZ-in a tarlan danin an in thar hi dollar maktaduai 200 man a ni hem mai! Hei hi California bikah chuan chena atana mimal hnena in hralh to ber record a la ni a, a hmaa hetiang record chu dollar maktaduai 177 man in a ni.
He in hi square feet 30,000 a zau niin, concrete leh darthlalang a ni a, 2003 khan art collector William Bell-a’n dollar maktaduai 14.5-in a lei a, chumi hnuah Japanese architect Tadao Ando ruaiin, an chei tha leh vek a ni. He in hi L-shape niin, a chhuat atanga ceiling thleng a darthlalang hmanna a ni a, a pawnlamah swimming pool, cabana leh grass lawn awmin, Pacific Ocean thlir theihna hmun remchang tak mai a ni.
Beyonce leh Jay-Z te nupa hian 2017 khan Bel-Air-ah dollar maktaduai 88 man in an lo lei tawh bawk a, tuna an in thar nen pawh a design a inang viau a ni.
Beyonce sawi takah chuan tunlai hian Renaissacne tour a nei tan tawh a, kar kalta khan Stockholm, Sweden-ah tanin, a show vawi khatah hla 37 zet a perform a, July ni 9 thleng Europe a hrut dawn a, chumi hnuah US a hrut zui leh dawn a ni.
He tour hi nikuma a album ‘Renaissance’ tihlar nana a tih a ni a, he album hi Billboard 200 (albums) chart-ah No.1 kaiin, Grammy-ah pawh best dance/electronic album a dawng a, he album-a a hla ‘Break My Soul’ chuan best dance/electronic recording a dawng a, ‘Plastic Off the Sofa’ pawhin best traditional R&B performance a dawn a, ‘Cuff It’-in best R&B song a dawng bawk.