Brandy-i’n Hollywood Walk of Fame-ah arsi nei dawn

Brandy-i’n Hollywood Walk of Fame-ah arsi nei dawn
Kumin chu Brandy tan kum tha a ni a, January thla tawp khan Black Music Collective bultumin Recording Academy Honors-ah Pharrell Williams leh Kirk Franklin te nen chawimawi an lo ni tawh a, tunah chuan a pualin Hollywood Walk of Fame-a arsi a nei ve leh dawn ta bawk.
Brandy hi 1998-a Monica nena an zai dunna ‘The Boy Is Mine’ avanga hriatlar kha a ni a, kha hla khan Billboard Hot 100-ah kar 13 a No.1 thei a, chart record siamin, hmeichhe zaithiam pahnih thawh dunnaah chuan he chart-a No.1 ni rei thei ber a la ni. He hla avang hian Grammy-ah best R&B performance by a duo or group with vocal a dawng a, Grammy nomination 13 a neih tawha award a dawn awmchhun a ni ta rih.
Brandy hian Billboard Hot 100-ah No,1 kai thei hla pahnih leh Hot R&B/Hip-Hop Songs chart-a No.1 kai thei hla pathum a nei a, Billboard 200 (US albums) chart-ah top 10 kai thei album pali neiin, chung zinga album pathum chu top three-ah an lang thei. Brandy hi lemchan lamah pawh a mikhual lo viau a, UPN sitcom Moesha (1996-2001)-ah a changtunu ber niin, TV musical film Rodgers & Hammerstein’s Cinderella (1997)-ah Whitney Houston nen an changdun tawh bawk.
Brandy arsi hi Hollywood Walk of Fame-a arsi 2,839-na tur a ni a, helai hmunhma hi Hollywood Chamber of Commerce enkawl niin, khualzin a maktaduai telin kumtin an tlawh ziah a ni.