Bharat Darshan Tour-ah Mizoram zirlai 100 an kal

Sawrkar laipui Ministry of Home Affairs hmalaknaa Border Security Force (BSF) ruahman, Bharat Darshan Tour-a Delhi-a kal tur zirlai 100, zirtirtu 8 leh tour guide-te chu Nilaini khan larsap Gen. Vijay Kumar Singh (Retd) chuan Raj Bhavan atangin a vailiam.
Bharat Darshan Tour-a kal zirlaite chu zirlaibua chuang chiah lo thil tam tak an zir tel dawn avangin uluk taka ngaihvena thil thar zir chhuah tum a, Mizoram tana hmasawnna thil engemaw tal rawn hawn tum turin a chah. Zawhna leh hriat duh an neih chu inthlahrung loa zawt zel tur leh hun tha an neih chu bawhpelh loa, hmasawnna atan hman tum turin a chah bawk.
Frontier HQ BSF Silchar DIG (G) Ahsan Sahedi chuan, BSF-in ramri venhim bakah ram inpumkhatna atan hma a la thin a. Ramri depa awmte tan Bharat Darshan Tour buatsaih thin niin, hemi tur hian MHA-in BSF chu kumin hian Mizoram zirlaite tana Bharat Darshan Tour buatsaih turin a ruat a. Hei hi BSF anga Mizorama Bharat Darshan Tour an buatsaih hmasak ber a ni tih a sawi.
Tun tum Bharat Darshan Tour atan hian district pali – Aizawl, Lunglei, Mamit leh Saitual-a school 8-a zirlai 100 leh zirtirtu 8 thlan an ni a. Ni 6 chhung September 3-8 awh tur niin, Delhi-a Indian history hmunhma pawimawh tak tak, cultural & heritage site, sawrkar office leh museum an tlawh dawn bakah MHA official-te nen an inkawm ang.
An zirlaibua chuang piahlamah thil pawimawh – India ram chanchin, hmunhma pawimawh, hmasawnna, khawtlang leh hnam ziarang hrang hrang leh sawrkar inrelbawlna zirtir tum an ni.