Biak in chhunga Sabrina Carpenter music video a film tir avangin pastor an chawlhtir

Sabrina Carpenter music video ‘Feather’ tih kha i en chuan a scene tawpna lha Our Lady of Mount Carmel-Annunciation Parish, Williamsburg, Brooklyn a film a ni a, he music video-ah hian thisen chhuahna a lang nasa hle a, biak in chhunga hetiang music video film phalna petu Catholic puithiam chu administration lama a hna atanga chawlhtir a ni tih New York Times chuan a tarlang.
He music video-ah hian Sabrina Carpenter, kum 24, hian amah avanga mipa eng emaw an thih dan vel a tarlang a, truck-in a sut hlum te, insual buaia thi te leh elevator-a necktie tanga avanga thi te an ni. A tawpah Carpenter chu biak in chhungah chuan chung mipa ho vuina niawm takah chuan thawmhnaw dum tawngchham tak hain a lam kual vel a, sakhaw serh leh sang khawihna maicham hmaah te a in-pose vel ngial bawk.
He music video hi an tlangzath hnu lawkah Bishop Robert J. Brennan chuan he music video an siam danah hian biak in enkawltu leh thuneitu ten biak in bungraw humhalh leh enkawlnan inkaihhruaina, diocesan policy chu biak in enkawltu leh thuneitu ten an zawm lo niin a sawi a, he inkaihhruainaah hian biak in chhunga video siam tur chu scene leh script te endik hmasak tur tih a nih thu Catholic News Agency chuan a tarlang.
He biak in enkawltu pastor, Msgr. Jamie J. Gigantiello chu administration lama a hna te chawlhtir nghal a ni thu New York Times chuan a tarlang a, an biak in Facebook page-ah Gigantiello hian thupha chawina tichhuakin, he music video film tur hi September thla khan phalna a pe niin a sawi a, phalna a pekna chhanah chuan online lama a enkualnaah Carpenter chu a chanchin tha lo leh mawihnai lo lam a hmuh loh vang leh artist naupang zawk te nena inlaichinna tha leh nghet zawk siam tumna a nih thu a sawi a, invuina scene kalpui a nih tur thu hriattir a ni a, mahse, music video lo chhuak ta chu an dilna nen a inmil ta chiah lo niin a sawi bawk.
‘Feather’ hi July 2022-a Sabrina Carpenter album ‘Emails I Can’t Send’ atanga single tar ber a ni a, he album atanga a hla dang ‘Nonsense’ ‘Because I Liked a Boy,’ Fast Times,’ leh ‘Skinny Dipping’ te pawh a music video a lo tichhuak tawh a ni.