Bial fel har Tuichawng bial fel tan
Mizorama political party lian pathumte’n inthlanpui lo awm tura an candidate tur an thlang fel a, ZPM-in Tuichawng biala ding tur an tifel lo tih loh chu party lian pathumte’n bial hrang hranga ding tur an tifel a; tunah chuan Tuichawng biala ding tur pawh hi ZPM-in an tifel ve leh ta.
Chakma Autonomous District Council (CADC) chief executive member lo ni tawh, tuna CADC-a ZPM president ni mek Shanti Jiban Chakma chu Thawhlehni khan Tuichawng biala ZPM candidate atana thlan fel a ni.
MNF, Congress leh ZPM te’n an tifel tawh a, mahse he biala MLA nei mektu BJP-in an la tifel lo. BJP-in bial danga an candidate tur an la tifel lo ang ngawt hi a ni lo a, party lian an nihna Tuichawng biala an candidate tur an la tifel lo hi chu a thawm a lian.
MNF candidate tur RM Chakma leh a pawlte’n ZPM an lut dawn emaw tih hnuah MNF-ah an let leh a, hei vang hian ZPM-in candidate tur an thlan fel har phah. Congress party chuan Hara Prasad an lo tifel tawh.
MNF-in candidate atana an lo thlan tawh, RM Chakma-in a luahlan tak DD Chakma chu ZPM-a lut thei tura ngaih a ni a, mahse ani hi a lut dawn ta lovah ngaih a ni.
DD Chakma hi BJP-ah a lut ang em tih chu zawhna awm thei a la ni a, BJP-in candidate tur an la tihfel loh avangin BJP lam hawi thei turah ngaih a ni. Mahse thu chiang a awm lo.
Tuichawng bialtu ni mek Dr BD Chakma (BJP) chuan din a tum tawh loh thu a lo puang tawh a, an district president Nirupam Chakma, minister hlui chu ding tura ngaihna a awm.
“Rumour hi ka hre ve lo. Kei chuan kan hotute thu thu-ah ka dah,” Nirupam Chakma chuan a ti a, “Party-in an thlang ang,” a ti. Delhi-a an party hotute’n ann ngaihtuah mek thu a sawi a, amah hi ruat ta se a ding ang em tia zawhna chu, “Hotute’n min tih chuan…” tiin a chhang.
Tuichawng bial hi bial ngaihnawm tak a ni thei dawn; CADC leh state-a sorkarna siamtu MNF hi an phir a, CADC-a party liana ngaih BJP hian CADC inthlan hnuhnung berah vote an hmuh tam loh bakah MDC pakhat chauh an nei. CADC huam chhung inthlanah chuan MDC an pawimawh a, party lian thin Congress-in MDC pakhat chauh an neih bakah an party hian CADC-ah tun hma an pha lovah ngaih a ni. ZPM hi CADC-ah an lian lo a, MDC an nei lo bawk. Chung zawng zawng bakah chuan party hrang hrangah lungawi lote chet danin awmzia a nei turah ngaih a ni bawk.