Bial KTP inkhawmpui hmang

Mizoram Presbyterian Kohhrana Kristian Thalai Pawl (KTP) chuan January 26-28 chhung khan Pastor bial hrang hrangah Bial inkhawmpui an hmang.
Zirtawpni zan khan palai lawmna inkhawm neih a ni a, report pek a nih bakah KTP member chatuan ram pan ta te sun an ni. Inrinni nilengin rorel inkhawm neih a ni a, branch hrang hrang atanga agenda lut rel a ni a, hruaitu thar thlan a ni bawk. Zanah Pathian biak inkhawm neih a ni.
Pathianni chawhma inkhawmah thusawi tura ruat sa te hnen atangin Pathian thuchah ngaihthlak a ni a, chawhnu lamah hruaitu tharte lawmluhna hman niin, Pathianni zanah Pathian biak inkhawm neih a ni.
Bial KTP inkhawmpui hman dan tur hi Bial Committee-in ngaihtuahin, a remchan dan anga hman thin a ni a. Bial hrang hrangah inkhawmpui hman dan a inang vek lo. Bial thenkhatah chuan thupui thlan bik neiin, speaker-ten an sawi a; bial thenkhatah chuan thupui thlan bik nei loin bial hruaituten an insawi chhawk a ni.
Central KTP hruaitute chuan inkhawmpui hi bial hrang hrangah an hmanpui a ni.