Biate ah PWD Sub Division hawng

Biate ah PWD Sub Division hawng
PWD Biate Sub- Division Office chu PWD minister Vanlalhlana’n Zirtawpni khan a hawng.
Minister chuan SASCI hnuaiah Biate leh a chhehvel khua tan kawngpui tha siam turin hma lak mek a ni tih a sawi a. Cheng vaibelchhe 15 sengin Artahkawn leh Biate inkar kawngpui siamthat a nih dawn thu leh Central Road Infrastructure Fund atanga dawn vbch. 10 sengin Tuipui kawng pawh siamthat a nih tur thu a sawi.
Transparency International leh NITI Aayog data behchhana CMS India Corruption Study-in a hmuhchhuah danin, Mizoram chu India rama Lakshadweep dawta eirukna tlem berna state a ni tih a sawi a. Thenzawl-ah PWD Division thar din a ni tawh a, tunah Biate ah Sub-Division din a ni leh a, heng hi khawtlangmiten an chhawr tangkai a, neitu rilru pu chunga sawrkar nen tha taka an thawhho a beisei tih a sawi a ni.
PWD chief engineer (Roads) David Sapzova report danin, Biate Sub-Division in a enkawl tur kawng chu – Chalrang atanga Biate panna, Khawhai atanga Tlangpui panna, Tlangpui atanga Lungva panna, Chalrang atanga Vantlang panna, Khawhai atanga Lungtan panna, Chalrang atanga Riangtlei kawng, Biate atanga East Lungdar panna, Biate atanga Tuipui panna, Biate atanga Bungzung panna kawng an ni.