Rev Dr Ramengliana
-- Advertisement --
Tunlai khawvela kan hriattur pawimawh tak chu Bible-in LGBTQA+ chungchang a zirtir dan hi a ni a. Bible thuneihna kan pawm dan chin leh hrilhfiah duh dan a danglam chuan kan thutlukna pawh a danglam mai dawn tih a hriat a. Mizo Kristiante zinga Bible thuneihna pawm dan chin inang lovin kan ngaihdan awm sa a rawn sutbuaina hmasa ber tur niin a lang thei a. Kan fimkhur a ngai hle reng a ni. Bible hi dik lo thei lo leh thuneitu bera kan ngaih loh chuan khawvel mite sawifiah dan chi hrang hrang pawh awihawm viauin a lang thei zel dawn a ni.
Bible hian LGBTQA+ chungchang hi a hranpa takin a chai lem lo va, sawi pawh a sawi tam lutuk lo. Amaherawhchu, sual a hrilhfiah dan te, inneihna leh mipat-hmeichhiatna chungchang a sawina atang tein a fiah viau thung a. Bibleah hian Mawngkawhur chungchang zirtirna hi hmun 4-ah kan hmu deuh ber a:
Genesis 19:1-13: Sodom leh Gomora Pathianin a hrem chhan kha he LGBT sualna ang chi vang hi nia sawi thin a ni a. Lota hnena thleng vantirhkoh 2 te kha an ‘pawl’ theih nana pe chhuak turin mipuiin an phut a nih kha. Tunlaiah hrilhfiah dan thar lo awm ta chu – mipuiin vantirhkoh 2 te an va dil kha sex hmanpui atan ni lovin enthlatu an nih leh nih loh fiah nan a ni, an ti. Chuvangin an sualna kha LGBT sualna ni lovin mikhual chunga nunrawnna lam a ni zawk, an ti. (Homosexuality and the Western Christian Tradition, 1955). A chhan pawh helaia ‘pawl’ tih tawngkam, Hebrai tawnga yada (know), hi Thuthlung Hluiah vawi 943 lai hman a ni a, chuta vawi 10 chiah chu mipat-hmeichhiatna hman sawi nana hman a ni an ti. Chuvangin, ‘Kan lo hmelhriat ve ang e,’ an tihna satliah angin an ngai a. Sodom khaw mihlun ni lem lo Lotan khatia mikhual dang a han nei ta kha an lawm lovin an ringhlel aniang an ti. Tin, Thuthlung Hlui hmun dang reng rengah hian Sodom leh Gomora sualna kha homosexuality anga sawina a awm lo, an ti bawk.
Sap mithiam John Stott hian hetianga sawi hi a pawm lo hle (Issues Facing Christians Today, 1984). A chhan pawh a sawifiah nghal: (i) Gen 18:20-a ‘an sual nasa em em’ a tih hi mikhual dawnsawn that vak loh thil mai mai niin a lang lo; (ii) a fanute pek chhuah a tumnaah khan sex lam rawng a kai tih chu a hriat theih; (iii) yada tih hi sex lam sawi nan vawi 10 chauh hman ni mah se Genesis bu bikah hian vawi 6 lai hman a ni a, Sodom chungchangah hman a ni ngat bawk a (19:8) ; (iv) Thuthlung Thar-ah Juda hian a sawi chhuak chiang hle a ni (v. 7). Tichuan, Homosexuality chauh kha Sodom sualna a ni kan ti thei lo tawp ang, mahse an sualnaah chuan a tel ngei ni chuan a lang. (Roreltute 19 en bawk la).
Leviticus 18:22 leh 20:13: Heta khapna kan hmuh hi chu a chiang kalh kalh hle. Thianghlimna thu a zirtirna zinga mi a ni hlawm a. An chhuahsan tawh Aigupta rama mite nun dan ching ve lo tur leh an va awmna tur Kanan mite tihdan phung entawn lo tura a tihna a ni a. Mipat-hmeichhiat thil chi hrang hrang, nausen hlan, milem biak leh khawtlanga dik lohna dan chi hrang hrang khapna a ni. Sawi mam tum phettute chuan serh leh sang lama intihthianghlimna thil, tunlai huna tangkaina leh awmzia nei tawh lem lo angin an sawi thin. Leviticus buin thil dang a khap tunlaia pawmzam tawh chi hrang hrang (Entirnan, ‘ran chi hrang hrang thlahtir’, ‘lova thlai chi hnih chin’, ‘puan chi hnih pawlh loh’, Lev 19:19; ‘khabe hmul meh’, Lev 19:27; ‘tattoo’, 21:5 ) sawi zawm si lovin eng vangin nge Homosexuality chauh in sawi bik? te pawh an ti thin a ni. Kan hriat tur chu, Thuthlung Hlui sakhaw serh leh sang thil tam tak leh nunphung pangngai a sawi tam tak hi Thuthlung Thar-a kan chhunzawm a tul tawh loh laiin nun dan tha (ethical code) te chu kan la chhawm nung zel a ni tih hriat tel ni se. Thuthlung Hluia a sawi ngat, Thuthlung Thara a sawi nawn leh Homosexuality te ang phei hi chu ngaihmawh a tul zual a ni.
Rom 1:18-32: Heti lai thu hi LGBT nunphung hnawlna thu chiang tak a ni a. Amaherawhchu, tunlai Bible hrilhfiahtu thenkhat chuan Paula hian tunlai huna kan hriat thiam ang hian an ni ho dinhmun hi a hre lo va. A hnawl tak hi chu nawmsip bawl nana hmang khaw lo ho an ni a, tunlai mi tam tak anga inhmangaih bil nei leh rinawm taka inkawp (loving relationship) ang chi hi a sawi tel lo, an ti. Chuvangin heti lai thu hi chu tunlai LGBT dinhmun zawng zawng hnawl nan chuan a hmantlak loh, an ti. Chik taka chhiara kan hmuh theih erawh chu, homosexuality hi thil pangngai lo a ni a, Pathianin thiam loh a chantir nasa hle tih hi a ni thung.
I Korinth 6:9,10 & I Timothea 1:8-11: Zotawng Bible-ah chuan chiang takin ‘mawngkawhur’ tih kan hmu a, Vanram kai lo tur list-ah a tel chiang hle a ni. Amaherawhchu, greek thumal malakoi leh arsenokotai tih te an lehlin duh danah ngaihdan phir a awm ta a. Zotawngah chuan malakoi hi ‘mi hur’ tiin a dah a. A awmzia tak chu ‘nem’ tihna a ni a, mihring sawi nan chuan ‘tuai deuh, nu deuh’ tihna mai a ni a. Amaherawhchu, he tawngkam an hman thin danah mipa leh mipa inkawpa a hmeichhia zawk chan chang sawi nan an hmang thin an ti. New Revised Standard Version chuan ‘male prostitutes’ (mipa nawhchizuar thin) tiin a dah a, English Standard Version thung chuan malakoi leh arsenokotai hi sawi hrang lovin ‘men who practice homosexuality’ (mipa leh mipa inngai thin) a ti mai bawk a.
Greek thumal arsenokoitai hi Tirhkoh Paula tawngkam hman bik nia sawi a nia. A hun lai midang kutchhuakah hmuh a ni meuh lo. LGBT sawi tum sela chuan hetiang mi sawina tawngkam lar zawk , paiderastes, pallakos, kinaidos, arrenomanes, leh paidophthoros te hman tur a tam a, chuvangin arsenokoitai a tih daih hian inhmangaihtawna inpawm pangngai sawina ni lovin awm herh leh inzawrh nana hmang tumtute sawi a ni, an ti a. Neih inang init inkawp pangngai sawina a ni lo, an ti a ni. NT Scholar Richard B. Hays-a thung chuan arsenokoitai hi Paula tawngkam bik ni mah sela Hebrai tawnga mishkav zakur , Lev 18:22 leh 20:13 –a kan hmuh, mipa leh mipa inngai sawina ngei a nih thu a sawi.(The Moral Vision of the New Testament: A Contemporary Introduction to New Testament Ethics,1996). A thuhrimah malakoi hi ‘mi hur’ sawina a ni a, arsen hi ‘mipa’ tihna a ni a, koitai’ hi ‘inngai’ tihna a ni a, a chiang angreng khawp a ni. Pherh piangthar Sam Allberry chuan, “Arsenokoitai chu neih inang mutdunna a ni a, malakoi nena Paulan a sawi zawm hian neih inang inngaite zinga mi pahnihte a sawina a ni mai,” a ti(Is God Anti-Gay? And Other Questions about Homosexuality, the Bible and same-sex attraction, 2013). A dik hmel khawp mai. Ngaih pelh tum hram dawn chuan tan nasat a ngai hle zawk a ni.