Biden leh Republican te inrem

White House leh Republicans te chuan a thuphungin US debt ceiling (leiba neih phak chin tihpun) tihsan chu inbiakna neih fe hnuah an remti dun ta a.
He inremna hi US Congress-in a pawmpui ngai a la ni thung a. President Biden chuan inremna chu ‘that tlan ve ve na’ tia a sawi laiin House speaker Kevin mcCarthy thung chuan ‘sum sen tihtlem nana pawimawh’ tiin a sawi ve thung.
A hmain US Treasury chuan inremna siam a nih theih loh chuan US chuan 5 June-ah sum a nei tawh dawn lo tiin a sawi a. Leiba pe thei lo leh sum nei lo ni se chuan ES economy mai bakah global market a nghawng viau tura ngaih a ni.
US chuan sorkar project te kalpui nan sum a puk belh a ngai ta a, a chhan ber pawh tax hmanga a sum lakluh aia tam a hman vang a ni.
Republicans te chuan debt limit tihsan a nih theih nan education leh social programme hrang hrangah te sum sen tihtlem an phut a ni.
A hma zawngin Senior party member te chuan sorkarin sum sen tihtlem a tum lo a nih chuan debt ceiling chu tihsan an remti dawn lo an ti a, Democrats te chua tax thenkhat tihsan an intiam bawk si a ni.
Inremna kimchang tarlan a la ni lo va, mahse, non-defence government spending chu kum hnih atana a ngaia dah niin kum 2025 ah 1% a tihdan chauh tur tia sawi a ni a.
Medicaid healh insurance lamah engmah thlak danglam a awm lo tia sawi a ni bawk a. Engtiangin nge sorkar programme kalpui mek a, sum lakluh hniam te hnena food-purchasing assitance pek kalpui zel dan tur pawh a chiang ta lo.
McCarthy chuan, “A kara kar inbiakna kan neih hnuah a thuphungin inremna kan siam thei ta a ni. Hna tam tak chinfel tur a la awm a, mahse, he inremna hi American mipuite tan rinna nghah ngamna a ni,” a ti a.
“Sum sen lam nasa taka tihniamin a awm dawn a, hnathawk te dinhmun tihthatna turin leh retheihna ata khai chhuah an nih theih nan reform kalpui a ni ang a, tax lak thar tur a awm lo va, sorkar programme thar a awm hek lovang” tiin a sawi.
President Biden pawhin thuchhuah a siamain, “Inremna chu that tlan ve vena a ni a, kan zavaia tana hlawkna tur a ni a, chu chu mawhphurhna la sorkar tihdan tur a ni bawk,” tiin a sawi a.
Sum puk san theih lama inremna chu American mipuite tana chanchin lawmawm a ni a, a chhan chu harsatna nasa tak thlenga hna tam tak chan phahna awm thei pumpelhin a awm a ni,” tiin a sawi.