Bihar-a sawi a hlawh mek laiin Odisha-ah SIR ti ve dawn
hlawh mek laiin Thawhtanni khan Odisha Chief Electoral Officer (CEO) R Sant Gopalan-a chuan an state-ah electoral roll special intensive revision (SIR) chu thla tharah an kalpui tan dawn tih a sawi.
Kum 2002 hnua Odisha-a SIR tih hnua an tih leh vawi khatna tur hi Gopalan-a’n a puan rual hian voter list thar chu January 7-ah tihchhuah a ni dawn tih a sawi.
“SIR hi thla thar atangin tih a ni dawn a, January-a ennawn hnua list chu a chhuak ang a. List tihchhuah hi Election Commission of India (ECI) thu angin tihkhawtlai thei a ni bawk,” a ti.
Gopalan-a hian an state-a polling booth awm pawh 38,000 atangin 45,000-ah tihpun a ni dawn tih a sawi bawk.
Kum 2002-a SIR tih a hnuah khan kum tin electoral roll hi ennawn thin a ni a, hetah hian in tin luta finfiah a ni ve ngai lo.
SIR tih tur hi chu a hautak dawn a, vote nei thei nei lo te, nei thei lo neite an awm thei dawn lo tih CEO chuan a sawi a. In tinah finfiah a ni ang a, voter-ten vote an nei thei tih finfiahna an en ang a, polling station khat huam chhunga vote nei awm zat inmil thei tur anga then a ni dawn bawk tih a sawi.
Thawhtannia Odisha CEO-in an state-a SIR tih a ni dawn tih a puan mek lai hian a hma lawka kumin kum tawpa inthlang mai tur, Bihar-a tih chuan thawm a nei lian mek zel a. Bihar-ah pawh hian kum 20 hnua SIR tih vawi khatna niin August 1-a electoral roll tihchhuahah a hmaa hming chuang nuai 65 dawn an tel lo.
Bihar-a SIR tih hi July thla khan Supreme Court-ah khin a ni nghe nghe a. Ningani khan court sang ber hian ECI hnenah vote nei ta lo nuai 65-te hming chu pe turin a ti a. Court hian langtlang taka thil tih a tul thu leh Thawhlehni thleng kha insawi fiahna hun a pe a, Zirtawpniah ngaihtuah leh a ni ang.
Kum 2024-a voter list-a a lan dan chuan Odisha-ah hian vote nei maktaduai 33.2 an awm a, mipa maktaduai 16.8 leh hmeichhia maktaduai 16.3 an ni a. Vote nei zinga 6,80,000 chu kum 60 chung niin kum 100 chung lam 9,060 an awm a. Pianphunga rualbanlo (person with disabilities – PwD) 4,57,000, kum 18-19 inkar 7,54,000 leh nihna chiang lo (third gender) 3,380 an awm.
ECI-in SIR tih tura kaihhruaina a siamah kum 2002 electoral roll-a chuang hman lote chu vote an nei thei ngei a ni tih commission hnenah an thehluh a ngai a. Bihar-a tihah khan Supreme Court chuan commission hnenah hian finfiah nan Aadhaar card pawh pawm turin a ti.