Bihar-in caste-based survey report tichhuak

Bihar chu India state zinga caste-based survey data tichhuak hmasa ber a ni ta a. Report a tihchhuahah population atanga 36 percent lawih te chu Extremely Backward Classes niin, 27.1 per cent te chu Backward Classes an ni a, 19.7 per cent te chu Scheduled Castes niin, 1.7 per cent te chu Scheduled tribe an ni thung a. General population chu 15.5 per cent niin State population pum chu 13.1 crore chuang a ni thung.
Survey chuan Yadav community – Deputy Chief Minister Tejashwi Yadav hnam te chu sub-group lian ber niin OBC category ah 14.27 per cent lawih an hauh bawk a.
He report hian politics-ah inhnialna nasa tak a siam gnei tura ngaih niin report chuan OBC quota tihpun rawt bawkin tunah 27 per cent an nei mek a. Tun dinhmunah state-a 63.1 per cent hauh mek an ni a. Report hian Bihar-ah OBC tena tam lama an chungnunzia pawh a pholang a ni.
Data tihchhuah a nih veleh Chief Minister Nitish Kumar chuan X ah post zui nghalin Gandhi Jayanti a report tihchhuah a ni kher chu a fak thu a sawi a.
“Bihar Assembly-a party pakua te chuan inhmuhkhawmna nei vat dawnin Bihar-a caste-based census chungchang sawiho a ni ang,” tiin Nitish Kumar chuan a sawi zui a ni.
Chief Minister awmna Janata Dal (United) party te chuan Bihar sorkar chuan history a siam tiin an sawi zui bawk a.
Tejashwi Yadav pawhin report chu chhinchhiahtlak tia sawiin kum sawm tam theih tawpa beih tawhna rah a ni a ti bawk a. “Tunah chuan sorkar policy leh thil tum te chuan zah a hlawh tawh ang,” tiin a sawi bawk.
Yadav pa leh Bihar CM hlui Lau Prasad Yadav pawhin, “BJP tena harsatna hrang hrang an siam chungin leh phiarrukna hrang hrang karah vawiin hian Bihar sorkar chuan caste-based survey data a tichhuak thei ta,” tiin a sawi bawk.
BJP te erawhin sawisel zuiin Giriraj Singh, Union Minister leh Bihar atanga Lok Sabha MP ni bawk chuan caste-based survey chu ‘hmaiphih tumna’ tiin a sawi zui thung a.
Bihar State BJP boss Samrat Choudhary thung chuan BJP te chuan he survey hi thlawpin JDU te enna an thawhho lai pawha an bultan a ni tia sawiin, “A methodology leh mechanism te kan zirchian hnuah sawi kan nei chauh ang,” tiin a sawi zui thung.
He survey hi kumin August thla khan zawhfel chauh niin Kumar chuan mi tinte tana hlawkna thlentu tur a ni tia sawiin society-a section tin te tana hmasawnna thlentu tur a ni tiin a sawi.
Kar kalta khan Congress hruaitu Rahul Gandhi chuan Madhya Pradesh inthlanah Congress ten sorkarna an chang a nih chuan caste-based survey an kalpui ngei tur thu a lo puang tawh bawk.