BIHAR INTHLAN: A thawh khat nan bial 121-ah vote thlak

BIHAR INTHLAN: A thawh khat nan bial 121-ah vote thlak
Bihar assembly inthlan boruak nung tak chu tan a ni ta a. Ningani khan bial 243 awma a zahve, bial 121-ah a thawh khat nan vote thlak a ni ta a, Chief Minister Nitish Kumar-a kaihhruai rorel lai, NDA chuan sorkar siam leh an inbeisei laiin Rashtriya Janata Dal (RJD) hruaitu, Tejashwi Yadav-a kaihhruai eptu tangrualte pawhin beisei an nei sang hle.
He chanchin ziah lai hian vote tla zat a la hriat theih loh va. An hruaitu lawk zingah Chief Minister Kumar leh a deputy Samrat Choudhary, RJD hruaitu Lalu Yadav leh a fapa, LJP hruaitu Chirag Paswan te chu vote thlak hmasa pawl niin mi dangte pawh thlak zel turin an sawm hlawm.
Prime Minister Narendra Modi-a pawhin Bihar mipuite chu ‘mipui rorelna kûtah’ vote thlak vek turin a sawm a. NDA-in hnehna an chan leh ngei a beisei thu a sawi bawk.
Eptu tangrual, Mahagathbandhan chuan rorel laite ninna leh in tina sorkar hna pek tiam chungin beihpui an thlak a, chief minister atana an tih, RJD hruaitu, Yadav-a hovin NDA lehthal an tum hle.
RJD hi kum 2020 inthlanah khan party malah chuan MLA ngah ber an ni a, tun tumah hian Yadav-a hovin thalaite vote hmuh tam tumin an bei nasa hle a ni.
BJP pawhin Prime Minister Modi-a leh a cabinet minister leh an rorelna state-a chief minister-te nen campaign an bei a. Kum 74 mi, chief minister vawi ruk lo ni tawh, Kumar-a chu an thehlar lovin tun tumah hian a kaihhruai JD(U) hi an hnungah an dah zawk a, chief minister a ni leh dawn em tih pawh a chiang lo nia sawi pawh a awm.
RJD nena tangdun, Congress chuan boruak lian takin campaign an tan a. Rahul Gandhi-a hovin Yadav-a te nen kawng an zawh nasa a; mahse, Congress hruaitu hi a hnu thla hnih zet a bibo zui thung.
Election strategist Prashant Kishor-a chuan a vawi khat nan Jan Suraaj Party a din nen inthlan an hmachhawn bawk a. Politic-a a lut ta hian zawhna a itam a, BJP ni lo vote a la hek nasa dawn nia ngaih a ni.
Kishor-a hian a party chuan bial 10 aia tlem emaw, 150 aia tam emaw an la thei tih a sawi a. Inthlan hma leh hnuah tumah an thawhpui dawn lo tih a sawi a. Bial tinah candidate an nei a, ei rukna leh ni tin mamawh harsatna an tlangaupui nasa hle.
Thawh khatnaa inthlanna hi Bihar lailia mite an ni deuh ber a. Kum 2020 inthlanah khan eptu tangrual hian heng bial 121-ah hian bial 63 an la a, BJP leh Kumar-a JDU-in bial 55 an la ve thung.