BIHAR INTHLAN: Yadav-a’n hmeichhiate Rs 30,000 pek tiam
BIHAR INTHLAN: Yadav-a’n
hmeichhiate Rs 30,000 pek tiam
Rashtriya Janata Dal (RJD) hruaitu, Tejashwi Yadav-a chuan Bihar assembly inthlanah hnehna an chang a nih chuan January atangin hmeichhiate hnenah kum khatah suma tanpuina Rs 30,000 an pe dawn tih a puang.
Bihar-ah hian a thawh khat nan Ninganiah mipuiin vote an thlak tawh dawn a, hemi hma lawk hian eptu tangrualten chief minister atana an zawrh hian rorel lai tangrual, NDA-in ‘Mukhyamantri Mahila Rojgar Yojana’ hmanga hmeichhe vaibelchhe khat chuang hnena anmahni puala an sumdawn nan Rs 10,000 an pek tawh chhan let nan sum pek hi a sawi chhuak a ni.
Patna-a thuthar lakhawmtute a kawmnaah Yadav-a chuan hmeichhiate hnena Rs 30,000 an pek tur hi ‘Mai Bahin Maan Yojana’ a nih thu leh Hindu kût pakhat, ‘Makar Sankranti’ (January 14)-ah an pek tan tur thu a sawi a ni.
“Hmun hrang hrangah kalin hmeichhiate ka kawm kual nasa a. Bihar-a kan nute leh farnute hian ‘Mai Bahin Maan Yojana’ hi an lawm hle a. He scheme hian eibara intluktlanna a thlen dawn niin miin an ngai hlawm a ni,” tiin thuthar lakhawmtute hnenah hian a sawi.
Kar hmasaa eptu tangrualten manifesto an tlangzarhah khan hmeichhiate hi December 1 atangin thla tin Rs 2,500 an pek tan nghgal tur thu leh kum nga lo awm leh tur chhungin kum tin Rs 30,000 an pek tur thu an tar lang.
Yadav-a chuan Bihar-a ‘nute leh farnute’ phutna avangin January 14 hian a vaiin an pe dawn tih a puang a ni.
Lo neitute tan pawh thil tiamin buh lam kaihhnawih quintal khat zelah Rs 300 leh wheat-ah Rs 400 zel Minimum Support Price (MSP) bakah a belhna an dawng dawn tih a sawi.
Deputy chief minister hlui, Yadav-a zirtirtu, police, damdawi ina thawk leh sorkar mi rawih dangte chu an awmna district atanga km 70 huam chin zelah sawn kual an ni dawn tih a sawi bawk.
Manifesto-a an lo tar lan tawh angin Old Pension Scheme (OPS) pawh an sorkar phawt chuan an hman lehnghal tur thu a sawi bawk.
Bihar hi November 6 leh 11-a inthlang tur niin thawh khatna atana campaign theih hun phei chu Thawhlehni tlai khan a tawp tawh a. November 14-ah vote tlate an chhiar dawn a ni.