Bike chesualah kum 13 Hareesh a thi

Inrinni khan Chennai khuaa Madras International Circuit-ah MRF MMSC FMSCI Indian National Motorcycle Racing Championship an tlan a, Bengaluru naupang kum 13 mi leka upa Copparam Shreyas Hareesh chu third round-ah che-sualin a nunna a chan a, in-tlansiak promoter Madras Motor Sports Club chuan Inrinni leh Pathianni atana race duansa zawng zawng thu leh awm hma atan an titawp lailawk rih.
July 26, 2010-a piang, rising star rawn ni chho tan mek Hareesh hi Bengaluru-a Kensri School naupang niin, national level-ah vawi duai lo hnehna a lo chang tawh a, chu’ng zingah chuan a zawna tum li ngawt a champion pawh telin, tun season-ah hian Petronas TVS One-Make Championship rookie category-ah a inlan a, a vanduai zui ta a ni.
Inrinnia rookie race an tan hnu lawkah pole position-a tlanchhuak Hareesh hi Turn-1 a pel fel hlawt tihin a chesual ta hlah a, a luah hliam na tak tuarin, red-flagged vai a ni a, trauma care ambulance hmangin tlankawng bulhnaia damdawi in panpui nghal ni mah se hospital-ah hian a thi tih nem-ngheh a ni a, thihna khuma a mut lai hian a kiangah a pa Copparam Hareesh a awm nghe nghe.
MMSC president Ajit Thomas chuan rider naupang leh a talent kawl avanga hmalam hun nei eng tak an chan ta mai chu lungchhiat-thlak a tih thu sawichhuakin, chetsualna a thlen rualin medical puihna dawng chung leh hospital panpui nghal ni mah se a nunna an chhan zo lo tih a sawi a, an boruak tawn avanga kartawpa an hmabak intlansiak zawng zawng an cancel vek thu a sawi rualin MMSC chuan lusun chhungte a tawrhpui takzet thu a tarlang tel.
Kumin May thla mai khan Hareesh hian MiniGP India title hlawhchhuakin, Spain rama MiniGP race pahnih a hma-chhawn bawk a; Spanish leilunga intlansiak pahnihah hian pangana leh palina a hauh.
Ruahman lawk ang chuan tun August thla hian Malaysia rama tlankawng hmingthang Sepang Circuit-a MSBK Cham-pionship 2023 hmachhawn zui leh tur a ni a, tah hian 250cc cate-gory (Group B)-ah CRA Motor-sports team tana inlan tur a ni.
Inrinni Chennai vanduaina kha kumin chhunga Indian motorsport-in lu a sun vawihnihna niin, January thla khan India rama racer ngaihhlut hlawh zinga mi, kum 59-a upa ni tawh KE Kumar chuan a nunna a lo chan tawh bawk.
He thihna pawh hi Madras International Circuit bawka thleng niin, MRF MMSC FMSCI Indian National Car Racing Championship 2022 second round an tlan laia thil thleng tawh a ni a, hun engngemawchen damdawi ina a hliam enkawl a nih hnuah a hliam tuarchhuak zo loin a lo thi tawh bawk a ni.