Bill pahnih leh official resolution pawm

Bill pahnih leh official resolution pawm
Mizoram State Legislative Assembly thukhawm chuan Ningani khan bill pahnih leh official resolution pakhat putluh chu a pawm.
Home minister K Sapdanga putluh – The Mizoram Urban and Regional Developmemt Bill 2025 chu siamthat ngai laite siamtha turin House-in a pawm a. Bill puluttu chuan Mizorama zaa 52 chu khawpuia cheng an ni a, kum 2011 atanga 2021 inkar khan khawpuia cheng zat chu zaa 23.48 in an pung a, khawpui than dan ruahmanna mumal zawka siam a nih theihnan dan hman mek, MURD ACT 1990 chu kum 35 kalta ami a nih avangin, sawrkar laipui atanga scheme lokalte a phuhru zo tawh loa, siamthat ngai leh belh ngai a tam tawh avangin siamthat ai chuan a thara thlak mai a chi zawka an hriat avangin bill thar – The Mizoram Urban and Regional Developmet Bill, 2025 hi duan a ni tih a sawi.
The Mizoram (Village Councils) Bill 2025 puluttu Local Administration minister C Lalsawivunga chuan, kum 72 liam hnua dan siamthat dilna tur a ni, tiin, dan thar danglamna tur chu, VC member zingah sawrkar sum tichingpen an awm chuan VC tawp thiat loin, a tisualtu member hrem theih a ni dawn a; he bill-ah hian dan hluia a tha lai leh la hman chhunzawm theih zawng zawng senglutin, VC din, thiah, a term chhung, hmeichhe tana seat hauhsak, VC executive body, an rorel dan tur chu a ngai ang leh tlema tidanglam hretin dan tharah hian sengluh vek a ni tih a sawi.
Hei bakah hian VC thuneihna tam zawk pek rawt a ni a, chiang leh felfai zawkin an thuneihna pawh ziah a ni tih sawiin, VC inpek theih dan mumal zawka siam a ni a, India danpuia panchayat mawhphurhna zawng zawng sengluh a ni tih a sawi bawk.
VC member awm thei zat chu dan hmasaah chhungkaw awm zata teh a nih laiin, dan tharah chuan mihring cheng zata teh a ni tawh dawn a, mihring 500 chennaah member 3, 500 aia tam awmnaah member 5, 1000 atanga 2000 inkara awmnaah member 7, 2000 chunglamah member 9 an awm anga, VC term chu kum 5 a ni dawn a, sawrkarin tul bik thilah chuan thla 12 thlengin a pawtsei thei dawn tih a sawi a ni.
Mizoram Legislative Assembly-in official resolution, “The Water (Prevention and Control of Pollution) Amendment Act 2024” puluttu, Environment, Forests & Climate Change minister Lalthansanga chuan he resolution tum ber chu, tui thianghlim neih theihna tura tui hna ven a ni tih a sawi. Parliament-in state tin House-in hmang ve tura a tih avanga pulut a ni tih a sawi a. Dan bawhchhia chu a hmaa kum 6 thleng lung in tang tura hrem theih an ni a, tunah chuan cheng nuai 15 thleng chawi theih tura tih a ni tawh tih a sawi a ni.