Billboard 200-ah Morgan Wallen ‘One Thing at a Time’ a la No.1

Billboard 200-ah Morgan Wallen ‘One Thing at a Time’ a la No.1
Morgan Wallen album ‘One Thing at a Time’ chu Billboard 200 (albums) chart-ah a No.1 a, he chart-a a zawna kar thum a No.1-na a ni ta. Hetihrual hian U2 pawh cart top 10-ah an rawn lang thar ve leh ta bawk.
Billboard 200 hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralh zat bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Morgan Wallen ‘One Thing at a Time’ hi kar khat chhunga copy 2,09,500 hralh leh a, hei hi a kar thum nan chart-ah a No.1 pui leh ta a ni. He album hi a kar khatnaah copy 5,01,000 hralhin, No.1-ah a debut a, a kar hnihnaa pawh copy 2,59,000 hralh lehin, heti hian kar thum chhung chu a zawnin kartin copy 2,00,000 an la hralh tling ziah a, tun thla 12 chhungin hetiang ti thei hi Taylor Swift album ‘Midnights’ chiah a awm a, ‘Midnights’ hi kar li chhung a zawnin kartin copy 2,00,000 an hralh tling ziah a ni.
‘One Thing at a Time’ hi streaming atangin copy 1,94,000 (on-demand official stream maktaduai 256.13) a tling a, album tak tak hralh zat chu 12,500 niin, album-a hla mal hralhna atangin 3,000 tlukpui an kai thei bawk.
Chart No.1 hlui SZA ‘SOS’ chu copy 72,000 hralh lehin No.4 atangin No.2 a kai thar leh a, chart No.1 hlui bawk Taylor Swift ‘Midnights’ chu copy 61,000 hralh lehin No.6 atangin No.3 a kai thar ve leh ta bawk.
U2 album thar ‘Songs of Surrender’ chu copy 46,500 hralhin No.5-ah a debut a, he chart a top 10 kai thei album 13 an neihna a ni. U2 hian 1980s, 90s, 2000s, 2010s leh 2020s-ah te chart top 10 kai thei album an nei ta a, group-ah chuan hetiang tithei palina niin, AC/DC, Def Leppard leh Metallica te hnung an zui ve ta a ni.
Chart top 10-a lang dang te chu chart No.1 hlui vek an ni a, Karol G ‘Mañana Será Bonito’ chu copy 45,000 hralh lehin No.5 atangin No.6-ah a tawlh a, Morgan Wallen ‘Dangerous: The Double Album’ chu copy 42,000 hralh lehin No.7-ah bawk a awm leh a, Metro Boomin ‘Heroes & Villians’ chu copy 40,000 hralh lehin No.8-ah bawk a la awm a, Drake leh 21 Savage ‘Her Loss’ chu copy 38,000 hralh lehin No.10 atangin No.9 a kai thar leh a, Bad Bunny ‘Un Verano Sin Ti’ chu copy 37,000 hralh lehin No.9 atangin No.10-ah a tawlh ve ta bawk.