Billboard 200-ah Toby Keith ’35 Biggest Hits’ a No.1

Kar liamta mai khan cancer a vangin a thi a, country star Tobey Keith album ’35 Biggest Hits’ chu hralh a kal thar leh a, Billboard 200 (albums) chart-ah No.1 a kai a, he chart-a a Tobey Keith album No.1 kai thei pangana leh, 2010 hnua he chart-a a album No.1 kai leh thei hmasa ber a ni.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpuileh album-a hla mal hralhna atanga album tlukpui te belhkhawm thin a ni.
February ni 7-a pum cancer avanga thi, country star Tobey Keith album te hi a thih hnuah hralh a kal thar leh a, a best-of collection album pawh hi kar khat chhungin 66,000 hralhin, No.1 a kai ta a ni. He album hi 2008-a a tlangzarh kha niin, a tlangzarh hlimah hian chart No.2 a kai. He album-ah hian hla 31 a awm.
’35 Biggest Hits’ hi 66,000 an hralh a, chung zinga 46,000 chu streaming atanga album tlukpui (on-demand official stream maktaduai 64.04) a tling a, album tak tak hralh chu 11,000 niin, album-a hla mal hralhna atangn 9,000 a tlin thei bawk.
Kar liamta chart-ah khan No.1 chu Morgan Wallen country album ‘One Thing at a Time’ a ni a, tun hi kum 9 chhunga he chart-ah No.1 thlaktuah country album bawk a tan lehna hmasa ber a ni.
Morgan Wallen ‘One Thing at a Time’ hi 65,000 hralh lehin No.1 atangin No.2-ah a tawlh a, chart No.1 hlui album pali-in an dawt a, SZA ‘SOS’ chu 53,000 hralh lehin No.6 atangin No.3 a kai thar leh a, 21 Savage ‘American Dreams’ chu 51,000 aia tam deuh hralh lehin No.2 atangin No.4-ah a tawlh a, Taylor Swift ‘Midnights’ chu 51,000 hralh lehin No.9 atangin No.5 a kai thar leh a, Drake ‘For All the Dogs’ pawh 49,000 hralh lehin No.3 atangin No.6-ah a tawlh ve ta bawk.
Noah Kahan ‘Stick Season’ chu 49,000 tling lo deuh hralh lehin No.4 atangin No.7-ah a tawlh a, chart No.1 hlui Taylor Swift ‘1989 (Taylor’s Version)’chu 48,000 hralh lehin No.5 atangin No.8-ah a tawlh a, chart No.1 hlui tho Taylor Swift ‘Lover’ chu 45,000 hralh lehin No.7 atangin No.9-ah a tawlh a, chart No.1 hlui bawk Zach Bryan self-titled album chu 42,000 hralh lehin No.8 atangin No.10-ah a tawlh ta bawk.