Billboard 200-ah Travis Scott ‘Utopia’ a la No.1

Billboard 200-ah Travis Scott ‘Utopia’ a la No.1
Travis Scott album thar ‘Utopia’ chu Billboard 200 (albums) chart-ah a No.1 a, he chart-a a zawna kar hnih a No.1-na a ni ta a, tun kum hnih dawn chhunga he chart-a rap album kar khat aia No.1 ni leh thei hmasa ber a ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Travis Scott ‘Utopia’ hi kar khat chhungin US-ah 1,47,000 an hralh leh a, chung zinga 1,10,000 chu streaming atanga album hralhna tlukpui (on-demand official stream maktaduai 145.99) niin, album tak tak hralh zat chu 37,000 a ni a, album-a hla mal hralhna atangin 1,000 a tling thei bawk.
Chart No.1 hlui Morgan Wallen ‘One Thing at a Time’ chu 92,000 hralh lehin No.3 atangin No.2-ah a insawn thar leh a, Barbie movie soundtrack chu 74,000 hralh lehin No.4 atangin No.3-ah a insawn a, chart No.1 hlui Taylor Swift ‘Speak Now (Taylor’s Version)’ chu 60,000 hralh lehin No.5 atangin No.4 a kai thar leh a, Swift album dang, chart No.1 hlui tho ‘Midnights’ chu 56,000 hralh lehin No.8 atangin No.5 a kai thar ve leh ta bawk.
Chart No.1 hlui Taylor Swift album ‘Lover’ chu 51,000 hralh lehin No.10 atangin No.6 a kai thar leh a ,Post Malone ‘Austin’ chu 50,000 hralh lehin No.2 atangin No.7-ah a tawlh a, Peso Pluma ‘Genesis’ chu 47,000 hralh lehin No.7 atangin No.8-ah a tawlh a, chart No.1 hlui Taylor Swift ‘Folklore’ chu 44,000 hralh lehin No.12 atangin No.9-ah a invawrh thar leh a, tihian Swift hian a vawi thum nan hian tum khatah he chart top 10-a lang thei album pali a nei leh ta a, zaithiam damlai zingah hetiang tithei hmasa ber a ni. Chart No.1 hlui bawk Morgan Wallen ‘Dangerous: The Double Album’ chu 43,000 hralh lehin No.9 atangin No.10-ah a tawlh ve leh ta bawk.