Billboard 200 chart-ah ‘Zach Bryan’ a la No.1
Zach Bryan self-titles album ‘Zach Bryan’ chu Billboard 200 chart No.1-ah a debut a, he chart-a a zawna kar hnih a No.1-na a ni ta. Hetihrual hian September ni 1 boral Jimmy Buffett pawh top 5-ah a rawn lang thar leh ta bawk.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘Zach Bryan’ hi a kar hnihnaah 1,15,000 hralh lehin, chung zinga 1,11,000 chu streaming atanga album hralhna tlukpui (on-demand official stream maktaduai 144.08) leh album tak tak hralhna 3,000 bakah album-a hla mal hralhna atangin 1,000 a tling thei a, hei hi a kar hnih nan a No.1 pui leh ta a ni.
Zach Bryan album hi Billboard hian country, Americana/folk leh rock genre-ah an rin lut a, rock album zingah tun kum sarih chhunga he chart-a kar khat aia rei No.1 thei awmchhun a la ni a, Americana/folk huangah pawh 2015 hnua he chart-a kar khat aia rei No.1 ni leh thei hmasa ber a ni bawk.
Chart No.1 hlui Morgan Wallen ‘One Thing at a Time’ chu 84,000 hralh lehin No.3 atangin No.2 a kai thar leh a, chart No.1 hlui bawk Travis Scott Utopia chu 72,000 hralh lehin No.2 atangin No.3-ah a tawlh ve thung.
September ni 1-a chatuan ram pan ta, hranghlui zaithiam Jimmy Buffett best-of compilation, 1985-a a tlangzarh tawh ‘Songs You Know by Heart: Jimmy Buffett’s Greatest Hit(s)’ 52,000 hralh lehin No.4-ah a invawrh a, he album hi an tlangzarh kumah No.100 a kai pha tawk a, kum 76 mi a September ni 1-a a thih hnuah a album-in hralh a kal thar leh a, chart top 10-ah kaiin, No.4 a ni pha ta hial a, Jimmy hian a thih hnuah chart top 10 kai thei album neih belhin, top 10-a lang thei album 13 a nei tling ta a ni.
Chart No.1 hlui Taylor Swift ‘Midnights’ chu 45,000 hralh lehin No.4 atangin No.5-ah a tawlh a, chart No.1 hlui bawk SZA ‘SOS’ chu 45,000 tling lo deuh hralh lehin No.5 atangin No.6-ah a tawlh a, Barbie soundtrack chu 42,000 hralh lehin No.6 atangin No.7-ah a tawlh a, Peso Pluma ‘Genesis’ chu 42,000 tling lo deuh hralh lehin No.7 atangin No.8-ah a tawlh a, chart No.1 hlui Taylor Swift ‘Lover’ chu 41,000 hralh lehin No.8 atangin No.9-ah a tawlh a, chart No.1 hlui bawk Morgan Wallen ‘Dangerous: The Double Album’ chu 41,000 tling lo deuh hralh lehin No.10-ah bawk a la awm.