Billion club-ah Karol G & Shakira ‘TQG’ leh Black Sabbath ‘Paranoid’

Karol G leh Shakira te hla ‘TQG’ music video chuan YouTube-ah vawi tluklehdingawn en a hlawh ta a, Black Sabbath hla ‘Paranoid’ pawhin Spotify-ah vawi tluklehdingawn stream a hlawh ve ta bawk.
Karol G leh Shakira ‘TQG’ hi inthenna hla niin, heng Colombian star pahnih te hian an music video hi nikum February ni 24-a an tihchhuah kha a ni a, Karol G ‘Manana Sera Bonito’ album ami niin, a hla thu laimu hi chu “I tan ka tha mah mah e, min phu lo” tih lam a ni ber e.
‘TQG’ hi Karol G leh Shakira tan YouTube-a an music video vawi tluklehdingawn en hlawh thei an neih pariatna ve ve a ni a, Karol G music video dang “China,” “Tusa,” “Secreto,” “Bichota,” “Culpables,” “Ahora Me Llama” leh “El Makinon” te chu billion view club-ah an lo tel tawh a, Shakira hla “Waka Waka (This Time for Africa),” “Chantaje,” “La Bicicleta,” “Hips Don’t Lie,” “Can’t Remember to Forget You,” “La La La” leh “Perro Fiel” te pawhin he mellung hi an lo thleng tawh bawk a ni.
‘TQG’ hi an tlangzarh hlimah Billboard Global 200-ah No.1 a kai a, Billboard Hot 100-ah pawh top 10 kaiin, Karol G tan he chart top 10-a a lan vawi khatna a ni a, 2023 MTV Video Music Awards-ah best collaboration an dawng bawk a ni.
Karol G sawi takah chuan Billboard Women in Music Awards-ah 2024 Women of the Year hlan a ni bawk tak e.
Black Sabbath hla ‘Paranoid’ pawhin Spotify-ah vawi tluklehdingawn stream a hlawh ve ta. He heavy metal hla hi kum 50 kaltaa an tlangzarh tawh kha a ni a, 1970-a an album ‘Paranoid’ title track niin, a hla hi a vanglaiin Billboard Hot 100-ah No.61 a kai.
He hla hi Spotify bakah streaming platform hrang hrangah a che tha viau a, mahse, Black Sabbath bassist Geezer Butler chuan 2004-a Guitar World-in an kawmnaah he hla hi minute nge chhung leka studio-a an ziah zawh hman niin a sawi a, an album-ah minute thum vel hmun awl hnawh khat nana chawpchilh taka an phuah niin a sawi.
Black Sabbath hi Rock and Roll Hall of Fame-ah 2006 khan lakluh an lo ni tawh a, BMG vice president James Farrelly chuan, “Black Sabbath ‘Paranoid’-in Spotify-a stream tluklehdingawn a kai thei hian he hla hi chhuan tam tak daih a ni tih an record kum en hian a tichiang a ni,” a ti.
Spotify hi 2008 atanga an tih tan a ni a, he streaming platform-ah hian hla vawi tluklehdingawn stream kai thei hi hla 581 a awm tawh a ni.