Billion Club series-ah Bad Bunny

Spotify Billions Club series episode thar berah Bad Bunny a lang a, ani hi Spotify-a vawi tluklehdingawn stream hlawh thei hla ngah ber a ni. Bad Bunny chuan a hla ‘Titi Me Pregunto’ vawi tluklehdingawn stream kai thar chungchang sawiin, “He hlain stream tluklehdingawn a kai a ka lawmna leh a vawi 5,000 play a hlawh a ka lawm dan kha a danglam chuang lo. Ka tan chuan miin an lo ngaithla duh tih hriat baka hlu kha a awm chuang lo,” a ti.
Titi Me Pregunto hi a album hit zet mai ‘Un Verano Sin Ti’ atanga a single niin, Bad Bunny hla zinga Spotify-a vawi tluklehdingawn stream kai theih hla tharlam ber a ni. Spotify chuan an streaming platform-ah hian Bad Bunny hian vawi tluklehdingawn stream hlawh thei hla 12 a nei tawh tih an puang a, Spotify history-ah zaithiam zinga vawi tluklehdingawn stream kai theih hla ngah ber a ni a, a hla hrang hrang he streaming platform-a stream tawh zawng zawng belhkhawm phei chu vawi tluklehdingawn 58 a tling tawh a, tun kum thum chhunga Spotify-a zaithiam stream nasat ber a ni bawk.