Biometric-ah centre la inpeih lo Raltlan sing 4 chuang awm mek
Tualchhung buaina avanga ram thenawm atanga sahimna zawnga rawn lutte biometric-a chhinchhiah tumnaah sawrkar laipui Ministry of Home Affairs lam a la inpeih lo niin Mizoram Home minister chuan a sawi a. Tuna sawrkar chhinchhiah chinah state leh ram thenawm atanga sahimna zawnga rawn tlanlut mi sing 4 chuang an la awm.
Assembly Session-a zawhna chhangin Home minister K Sapdanga chuan, biometric data lak chu India sawrkar thuchhuak a ni a, Ministry of Home Affairs nen indawr mek zel niin, ministry lam hi a la inpeih lo tih a sawi.
“A tira biometric identification atana Home ministry-in min hmantir a tum portal hi pawikhawihtute chhinchhiahna atana siam a ni a. Mizoram sawrkar chuan hman chi ah a ngai lo. Kan unau rawn lutte hi refugee pawh an ni loa, sahimna zawng an nih angin ‘displaced people’ anga chhinchhiah turin rawtna kan siam a, Home ministry hian min rawn la chhang lo,” a ti.
A pawng a puiin Mizoram sawrkar hian biometric identification hi a hnial a ni loa, tanna chin erawh a nei tih a sawi a ni.
Raltlan zat chu chhinchhiah hleihtheih loh, nitin mai ni lo, darkar tina danglam reng a ni tih Home minister hian sawiin, “Ramri chu kan nei a, kan ram thenawm hian sawrkar an nei loa, duty-na hmun chu awm mah se, duty lohna atanga kai theihna a tam a ni,” a ti. Raltlan nge sumdawng tih hriat lohin an inpawlh nasa a, tuna an chhinchhiah chin chu mi 41355 an ni tih a sawi a ni.
Raltlan puihna hmuh tam zawk chu sawrkar laipui atangin ‘secret fund’ a ni a. A zat sawi rem lo a nih laiin, a hmanna erawh, invenna atan chipchiar taka vawn a ni a, district tinah DC kaltlanga pek theih niin, hman zat a inang lo zung tih a sawi.
Sawrkar laipuiin raltlan tana buhfai a pek chu a thlenna hmun tur a thleng kim tawh nia an hriat thu a sawi a ni.
Raltlan zingah an in leh lo chan, hak lai nena rawn tlan thla, khawngaihthlak tak tak an awm laiin, an karah harsatna siam thin an inzep a, hetianga harsatna siam chingte hi raltlan vek pawh hian an haw ve hle a, engemaw tih state sawrkarin a ngai tih a hria a. A ngaihtuah tur bik Committee an indin tih Home minister hian a sawi.
Bangladesh rama buaina awm hnu ah India sawrkar a fimkhur zual a, ramri vengtu Boder Security Force leh NGO inkarah engemaw a thleng foa, state sawrkar puihna in NGO leh BSF-in raltlan rawn luh tum inchuh chang an nei fo a, lemchan deuhte pawh a ngai thin tih a sawi bawk.