BJP do tura Opposition coalition hming tur INDIA

Bengaluru khawpuiah India rama opposition party te chuan Lok Sabha inthlan huna BJP te paihthlak an nih theih nan tanrual an tum a, ruahmanna an siam fel ta a.
Opposition coalition chu INDIA – Indian National Democratic Inclusive Alliance tih a ni dawn a ni.
Opposition party tel zinga 26 chu a lian zual niin chung zingah chuan Indian National Congress chu a lian ber a. Opposition bloc ah sulsutu niin MP 80 neiin Lok Sabha-ah 49 leh Rajya Sabha-ah 31 a nei mek a. State pali – Karnataka, Rajasthan, Chhattisgarh leh Himachal Pradesh ah te sorkar an siam mek a. Bihar, Tamil Nadu leh Jharkhand ah te sorkar lai zingah a tel bawk.
All India Trinamool Congress (TMC) Mamata Banerjee kaihhruai chuan West Bengal ah thuneihna chang mekin MP 35 lai (Lok Sabha-ah 23 leh Rajya Sabha-ah 12) a nei mek.
Dravida Munnetra Kazhagam (DMK) – Tamil Nadu Chief Minister MK Stalin kaihhruai te pawh telin Tamil Nadu leh Puducherry-ah an lian hle a. MP 34 lai neiin Lok Sabha-ah 24 leh Rajya Sabha-ah 10 an nei a ni.
Aam Aadmi Party (AAP) te pawh telin Arvind Kejriwal kaihhruai hian Delhi leh Punjab-ah sorkar an siam mek a, MP 11 neiin Lok Sabha ah pakhat leh Rajya Sabha-ah 10 an nei a. AAP te hi Congress nena inlaichinna a bik takin national level ah chiang lo ruai nei reng an ni thung.
Janata Dal (United) te chu Bihar Chief Minister Nitish Kumar kaihhruai niin Patna khawpuia inhmuhkhawmna hmasa ber thlengtu an ni bawk a. JDU te hian MP 21 neiin Lok Sabha-ah 16 leh Rajya Sabha ah panga an nei a. An chakna tak tak erawh hriatfiah har niin Kumar hian nikum khan BJP te nena an inzawmna chhu chatin RJD leh Congress te nen Bihar a sorkar-na a siam zui theih nan an inzawm a ni.
Rashtriya Janata Dal (RJD) Lalu Prasad kaihhruai pawh telin Bihar sorkar-a tel an ni bawk a, Lalu fapa Tejashwi Yadav chu deputy chief minister ni mek niin Rajya Sabha-ah MP paruk an nei mek bawk.
Jharkhand Mukti Morcha (JMM)- Jharkhand Chief Minister Hemant Soren kaihhruai pawh telin Lok Sabha-ah MP pakhat leh Rajya Sabha-ah MP pahnih an nei a ni.
Nationalist Congress Party (NCP) –Sharad Pawar din leh kaihhruai zawk te pawh telin tun hnaiah erawh NCP hi a phel thung a. A phel chu Sharad Pawar vahpa Ajit Pawar kaihhruai niin BJP te nen Maharashtra-ah sorkar intawm an siam mek a, deputy chief minister a ni mek bawk a ni. Sharad Pawar kaihhruai NCP te erawh Congress leh Shiv Sena (UBT) te nena tangrual mek an ni thung.
Shiv Sena (UBT) te hi Shiv Sena, Balasaheb Thackeray kaihhruai kalzel niin nikum June thla khan kehdarhin a tam zawk chu Eknath Shinde kaihhruaia kalin BJP te nen an inzawm a ni. Kum 2019 Maharashtra inthlanah khan Uddhav Thackeray chuan BJP te nena an inzawmna chhu chatin NCP leh Congress te nen Maha Vikas Aghadi sorkar a lo siam tawh thung.
Samajwadi Party (SP) te pawh telin Uttar Pradesh chief minister hlui Akhilesh Yadav kaihhruai a ni a, UP a opposition lian ber niin Lok Sabha-ah member pathum leh Rajya Sabha-ah member pathum tho a nei mek a.
Anni bakah hian Rashtriya Lok Dal (RLD) te pawh telin Jayant Chaudhary, party founder leh prime minister hlui Charan Singh tupa Ajit Singh din a ni a. Jayant Singh hi MP ni mek a ni bawk.
Apna Dal (Kamerawadi) te hi founder Sonelal Patel nupui Krishna Patel leh a fanu Pallavi Patel te kaihhruai a ni a, Kamerawadi faction te hi Samajwadi Party te nena inthlunzawm niin Apna Dal (Sonelal) erawh Union minister Anupriya Patel kaihrhuai niin BJP kaihhruai NDA zawmtu an ni thung.
Jammu and Kashmir National Conference (NC) te chu chief minister hlui Farooq Abdullah kaihhruai niin Jammu and Kashmir a pawimawh tak niin Lok Sabha member pathum an nei a. Peoples Democratic Party (PDP) te chu chief minister hlui tho Mehbooba Mufti kaihhruai niin tun dinhmunah erawh MP an nei lo.
Communist Party of India (Marxist) te chu Left bloc a party lian ber niin Kerala a LDF sorkar siam mek an ni a. State dang West Bengal, Tripura leh Tamil Nadu ah te pawh an lian hle bawk a. Lok Sabha-ah MP pathum leh Rajya Sabha-ah MP panga an nei mek.
Communist Party of India (CPI) te hi Kerala a rorel mek LDF a tel an ni a. Lok Sabha-ah member pahnih leh Rajya Sabha-ah member pahnih tho an nei. Communist Party of India (Marxist-Leninist) Liberation te chu Bihar coalition sorkar a tel mek niin State ah MLA 12 an nei a, Dipankar Bhattacharya kaihhruai an ni.
Revolutionary Socialist Party (RSP) te hi Left bloc a tel niin RSP te hian Lok Sabha member pakhat an nei a, West Bengal leh Tripura ah support base an nei bawk. All India Forward Bloc te pawhh Netaji Subhas Chandra Bose din niin left bloc a party tenau an ni tawh a, MP pawh an nei lo.
Rajya Sabha MP Vaiko kaihhruai MDMK te pawh telin Tamil Nadu a DMK sorkar a tel an ni a. VCK te pawh DMK coaltion a tel tho niin Lok Sabha MP pakhat an nei a, chutiang bawkin KMDK te pawh an ni a, MP pakhat an nei bawk a. MMK te pawh DMK coalition a tel tho an ni bawk.
Indian Union Muslim League (IUML) te hi Kerala a inbun niin Congress ally ni reng an ni a. Lok Sabha ah member pathum neiin Rajya Sabha-ah pakhat an nei bawk.
Kerala Congress (M) te pawhin MP pahnih neiin LDF sorkar a tel an ni a. Anni bakah hian Kerala Congress (Joseph)te pawh Kerala a inbun tho niin opposition coaltion a tel tho te an ni.