Kuki-Zo Group ah khi a awm em?

Kuki Inpi Manipur (KIM, Kuki tribes apex body) tena thuchhuah siama Constitution hnuaia Article 3 hnuaiah State hran an ngiat thu an sawi hnuah Manipur a Kuki-Zo civil society organisation (CSOs) karah khi a awm tan tia sawi a ni.
Thawhtanni khan Indigenous Tribal Leaders’ Forum (ITLF) te chuan meeting neiin separate state emaw Union territory emaw an phut thu an sawi tih thupuangtu Ginza Vualzong chuan a sawi a, Chutihlaiin Zomi Council (Zo tribes apex body) te chuan autonomy chungchang chu Union government nena inbiakna neih hunah chauh bultan theih a ni ang ti thungin ITLF ah an tel loh thu an sawi thung.
Suspension of Operations (SoO) groups 24 lai (Kuki leh Zo group telna) te Kuki National Organisation leh United People’s Front hnuaia awm te pawhin Zomi Council dinna chu thlawpin Kuki Inpi thuchhuahah an tel ve loh leh huam loh thu an sawi zui bawk.
Hetihlai hian Kuki-Zomi MLA 10 te chuan seperate administration ngiat zui lehin inlak hran chu inremna a awm theih nana inbiakna kalpui nana tihmakmawh tiin an sawi.
Mahse, group tin tena remtih tlan an neih chu seperation kalpui dan turah consensus lak ngei ni se an ti a, Manipur sorkar atanga inlak hran thuah erawh chuan an lungrual tlat thu an sawi bawk.
Manipur buaina hi May 3 a intan kha niin valley a inbun Meitei leh tlangrama awm Kuki-Zomi te inkara thleng niin tlangramah hian Naga te pawh an awm ve bawk a. Buaina chhuahna chhan tak hi Manipur High Court in State sorkar chu Meitei tena ST status an neih theih nana hma la tura a tih vang a ni. Buaina avang hian valley lama awm tlang mite chuan chhuahsanin tlangram an pan a, tlangrama awm Meitei te pawhin valley lam an pan bawk.
Hei vang hian State a Kuki-Zomi MLA 10 te chuan seperation an ngiat zui a, an thu leh hla chu Kuki-Zomi group tin ten thlawpin chung zingah chuan independent council leh CSO Kuki-Zomi group hnuaia sub-tribe tinte Hmar Inpui, Zomi Council leh a dangte pawhin an thlawp a ni.
CSOs coalition chu Coordinated Committee on Separate Administration Movement (CorSAM) tih hnuaiah dinzui niin chu chu tun hnai lawka din ITLF te pawhin an zawm a. Heng group te hian SoO group te nen pawh inbiakna neiin Kuki-Zomi MLA 10 te pawh inbiaknaah telin seperation administration nawr dan tur an duang a ni.
Mahse, tharumthawhna thleng zui mek zelah Kuki Inpi te chuan July 13 khan thuchhuah siamin Constitution hnuaia Article 3 hnuaiah seperate administration an ngiat thu sawiin hei vang hian CorSAM group a telte chu barakhaih hlein anmahni rawn lovin Kuki Inpi te chuan chet an la an ti a ni.
Zomi group-a awm te chuan tun dinhmuna seperation lo ngiat nghal chuan Centre nena inbiakna neih turah Constitution framework hnuaiah harsatna a thlen zawk thei an ti a.
“Seperation kalpui dan tura duh bik lo neih hmasak sawilan ngawt chuan inbiakna dawhkana Union government tel tur a titim thei” tiin Zomi Council aiawh chuan a sawi a, hei vang hian Zomi Council te chuan anmahni chhunga an chetlak zel dan tur ngaihtuahtu tur Steering Committee hran din ni se an ti zui bawk.
Kuki-Zomi MLA 10 tena hmalak zui zela Zomi Council duhdan kalpui an tum thu an sawi laiin legislator pakhat chuan, “Constitution hnuaiah inlak hran dan tur duhthlan tur tam tak a awm a. Chungte chu inbiakna hmanga chinfel theih vek a ni” tiin a sawi.
Hetihlai hian Hmar Inpui (Hmar tribe apex body) te chuan Kuki Inpi Manipur (KIM) tena thu leh hla an neih hnuah Special Assembly neiin July 15 khan Hmar ‘age-old identity’ Hmar Mizo nihna chu an puang chiang zui a, hei vang hian Zomi Council thutlukna ang chuan an thle mai zel dawn tih a langa ngaih a ni.
Hetihlai hian Suspension of Operations (SoO) groups a tel hel pawl lian pahnih KNO leh UPF te chuan Manipur atanga inlak hran chu Union government nena inbiakna dawhkanah an chhawpchhuah tur thu sawiin inbiakna dawhkana chinfel theih chauh a ni tiin an sawi zui bawk.