BJP-in MLA-te lawmpuina siam

BJP Mizoram chuan an party hminga MLA tling thar mi pahnih lawmpuina chu Thawhtanni khan an party office-ah an hmang.
Palak bialtu MLA thar K Hrahmo chuan Central BJP tha chakna hmangin Mizoram chu hma an sawntir dawn tih a sawi a. BJP hlauhna chu paihthlak a hun tawh, tiin, Congress pawh tunhma chuan Vai pawl, Vai Hindu pawl tia sawisel ni thin mah se, term 5 sawrkarna an chelh zui thei tho tih a sawi. “Hetiang chiah hian mipui kan thanharh hunah chuan kalphung dik tak leh system dik taka kalpui thin party hi Zoram mipuiin kan thlan tur hmabak a la ni dawn,” a ti.
Siaha bialtu MLA Dr K Beichhua chuan ei tur petu hlaua do tlatte an dam khawchhuak ngai lo, tiin, “Ei tur tha min petute kan do tlat chuan harsatna in min tlakbuak anga, he ram hi a dam tak tak thei dawn lo. Mizoram mipui hian hlauh loh tur kan lo hlauh thin avanga mawl kan intih hun a la thleng dawn a. Pathian leh mipui zara Mizoram MLA ka nih angin hlauh tur dik tak Pathian hi hlau zawk tur leh kan ram than lenna tur leh hmasawnna min pe theitu tur party lam hi hawi turin mipui ka sawm a ni,” a ti.