BJP kal dan zirchian a hun”

Central BJP hnuaia awm state hrang hranga BJP kal dan chu zirchian a hun tawh hle tih AAP Mizoram State vice president C Lalkhuma chuan a sawi.
AAP State vice president hian thuchah a tihchhuahah Manipur state-a buai chhan hrang hrang zingah sawrkar inrelbawlna fel loin a nghawng chhuah chu Zohnahthlak unauten an tuar ta tih sawiin, ‘Kan unaute lu la a, pala an han tar ta mai hi AAP Mizoram chuan tawrh hrehawm a tiin, kan na takzet a. India rama thleng atan chuan rapthlak lutukah ngaiin India ramah hetiang hi thleng leh tawh ngai lo se kan duh takzet a ni,’ a ti.
India ram BJP rorelna hnuaiah Kristiante kan him loin hnam tenau thlengin kan him loa, sakhuana lam atanga thlir pawhin Kristian leh Muslim tan phurrit a tam sawt hle tih C Lalkhuma hian a sawi a. Manipur-a BJP rorelna pawh Kristian leh tribal hnamte tan phurrit a lo ni ta tih a sawi.
‘Rilru fim taka ngaihtuahin political party-ah pawh awmna tur kan thlan thiam a ngai dawn ta hle. Kristian BJP kan ni, tih te bengin kan hria a, kan ram Mizoramah ngei pawh chu thu chu lamrikin a awm. Central BJP hnuaia awm state hrang hrang BJP kal dan hi kan zirchian a hun a. Hnam hnufual zawk leh Hindu sakhaw be ve lo, sakhaw dang biate tan an kaihhruaina hnuaiah hian kan him loh zia kan zirchhuak pha ngei tur a ni,’ a ti.