BJP mitmei a ven vangin CM-in Kristiante thlavang hauh ngam lo
BJP mitmei a ven vangin CM-in Kristiante thlavang hauh ngam lo
– Lal Thanzara
India rama Kristiante tih duhdah leh hmuhsitna thleng mekah Meghalaya chief minister pawhin a dem thu a sawi tawh laiin, Mizoram chief minister chuan tun thlengin demna thu a la sawi ve lo tih Congress hruaitu Lal Thanzara chuan a sawi a. BJP mirmei a ven vanga auchhuak ngam lo a ni tih a sawi.
Aizawl District Congress Committee chuan Thawhlehni khan ‘Aizawl City Area’s Block, Group, Unit Joint Meeting’ an nei a. Hmanpuitu MPCC president Lal Thanzara chuan, BJP, Bajrang Dal leh an thurualpuiten India ram atangin Kristiante nuaibo an tum tih chu khawvel hriat a ni a. MNF leh ZPM-in an thlawp tlat chu a vanduai thlak hle tih a sawi. Congress chu engti kawng zawng maha BJP note ni ve lo tur an ni a. Kan hnam leh kan sakhua a himna tura hma la thei awmchhun chu Congress chiah a ni tih a sawi a ni.
Nikum Krismas vuakvet tluka BJP leh a thurualpuiten Krismas lawmna an suasam nasat kha a la thleng ngai lo tih sawiin, Orissa state-a pastor pakhat chu dawt phuahchawpin an hek a, tuihawk an intir a, bawngek an ei tir a. Rawngbawltute hmusittu hi Congress chuan na takin a dem tih a sawi.
“Meghalaya CM pawhin a dem thu kan hmu a. Kan CM, kohhran upa hian a dem thu a sawi chhuah thu kan la ngaithla lo hi a vanduaithlak hle. BJP mitmei veng chunga an awm chuan Kristiante thlavang hauh an ngam dawn lo. Kan CM hlui Pu Hawla kha chu India ram Kristianten an thlamuanpui thin a, an tan a auchhuak fo a ni,” Lal Thanzara hian a ti.
Mizoram CM chu Mumbai mi hausa fapa nupui neih lawma a kal thua intih lar tum tawh loin, Kristiante thlavang hauh zawnga inti lar tawh turin an ngen tih Congress hruaitu hian a sawi a. Tuna mipui khawsak a harsat em em a pawh, enchhin sawrkarin inthlan laiin BJP sum an hmang a, an tlin tawh hnuin ngaihdan dang an neihsan leh si a, sum rawn petuten Mizoram tan sum an rawn release tha duh ta loa, mipuiin kan tuar mek niin a sawi.
“Mipui harsatna hria in, sawrkar hian Pu Beichhua hi dinhmun tha pe tawh se, central an au ei tawh mahna. Zoram mipui hmakhua ngaiin BJP nena an thawhdunna hi ti nghet tak tak tawh turin ZPM sawrkar hi thurawn kan pe a ni,” a ti.