BJP pawikhawihna ngaihdam theih loh – Kharge

Uttar Pradesh-a Kanpur khawpuia sorkar enkawl damdawiin Lala Lajpat Rai (LLR) Hospital-ah naupang 14 lai mai chuan thisen an inpek chhawnnaah Hepatitis leh HIV natna hrik an kai thu hriat chhuah a ni.
Congress President Mallikarjun Kharge chuan he thu hi sawiin “Naupang pawisawilo te chuan ngaihdam theihloh sual hremna BJP Party hnen atangin an tuar mek a ni” tiin a sawi. “Double-engine sorkar chuan kan health system pawh a double bawkin a damloh tir a ni. Kanpur, UP-a sorkar enkawl hospital ah chuan thisen zam felloh avanga damlo naupang 14 te chu HIV AIDS leh Hepatitis B, C natna hrik awmna thisen pek an ni. Hei hi a rapthlak-in a zahthlak em em a ni” tiin Kharge chuan a X-ah a ziak a ni.
Congress leader chuan Prime Minister Narendra Modi-an Dusshera chhunga thutiam 10 a neih te a tarlang a. “Niminah Modi-a chuan thil tihtur 10 hmangin thil ropui deuh deuh min zirtir a, BJP hi mipui hmaah a te ber atanga pholan theih turin a siam tawh em” tiin zawhna a siam a ni. Thuneitu te chuan naupang 14 te hi kum 6 atanga 16 te an ni a, thisen lam thalo (Thalassemia) damlo mi 180 te zinga thisen midangte hnen atanga dawngtu te an ni. Heng naupang natna kai te zingah hian pasarih te chu Hepatitis B niin, panga te chu Hepatitis C an ni a, pahnih dangte chu HIV an ni.
Thu dawnnain a sawi danin heng naupangte hi State hrang hrang – Kanpur City, Dehat, Farrukhabad, Auraiya, Etawah leh Kannauj atangte in an ni. “District level-a thuneitu te chuan he thil thlen chhan tak hi Viral Hepatitis Control Programme hnuai atangin an chhui dawn a. He team hian natna hrik Hepatitis leh HIV an kaina hmun tak an en chiang dawn a ni” tiin thuneitute chuan an sawi.