BJP president-in Rijiju hmu, Amit Shah hmu leh dawn
BJP president-in Rijiju hmu, Amit Shah hmu leh dawn
Delhi-a cham mek, Mizoram BJP president Dr K Beichhua, Siaha bialtu MLA-in India sorkar mi pawimawhte a hmu kual a, kar hmasa Zirtawpni khan union minister Kiren Rijiju a hmu.
Rijiju hnenah hian Mizoram University hna kal mek atana pawisa pek chhuah a tul thu a sawi a, cheng vaibelchhe 10 pek chhuah tawh a ni a, a dang cheng vaibelchhe 50 pek leh thuai ni se tiin a thlen a ni.
Dr K Beichhua hian Dr Jitendra Singh, union minister of state (independent charge) for science and technology and earth sciences pawh a hmu a, Mizorama CSR (corporate social responsibility) hmang kawnga thahnemngaihpui turin a ngen.
Amah Dr Beichhua sawi danin, ONGC hnuaiah CSR hmangin Mizoram puma skill development lam tanlak a tul thu leh, chumi atana theihtawp chhuahpui turin ziakin a thlen a, Dr Jitendra Singh pawhin theihtawp a lo chhuah tur thuin a chhang a ni.
Thawhtanni hian home minister Amit Shah a hmu dawn a, politics chungchang sawia inhmuh tum an nih thu Dr Beichhua chuan a sawi. Central service officer, Mizo, Mizorama lak chhoh chungchang pawh sawipui a tum thu a sawi bawk.
Mizoram BJP president hi Delhi-ah hian BJP president thlannaah a tel a, state hrang hranga BJP president theuhte inkawmnaah a tel bawk.